Chançon royal 124 : Il ot jadis tresgrant dissencion (MCLXI)

Autre balade

                        Il ot jadis tresgrant dissencion
                        Entre les vens, la mer et mainte terre,
                        Qui lors disoit : ― Vostre inundacion
                        Me grieve trop. Mer, pour quoy va tu querre,
5                      Pour moy grever, les gens qui me font guerre
                        Et les portes en si grant quantité
                        Que tout m’ardent et robent sanz pité
                        Quant ilz puent [des]sur moy leur port prandre ?"
                        La mer respont : ― Certe, ce fait esté,
10                    Mars, avril, may, juing, juil, aoust, septembre.

                        Seure ne sui fors en celle saison.
                        Adonc prannent les galees leur erre
                        Ou moys d’avril, par mainte legion,                                                  308c
                        Que Zephirus, li doulz vens, se desserre.
15                    Paisible suy, grans vaisseaulx, chascun erre
                        En Alixandre, a Damas la cité,
                        A plain voile, pour leur neccessité
                        D’avoir de poix et ce qu’om puet comprandre.
                        Puis les mettent arrier a sauveté
20                    Mars, avril, may, juing, juil, aoust, septembre.

                        Tu me blasmes, Terre, contre raison.
                        Tes gens viennent, non pas moy eulx, requerre.
                        En Occident, Midi, Septemtrion,
                        Leur fault souvent de l’un en l’autre acquerre
25                    Ce que pas n’ont. Je te faiz amisté
                        De les souffrir. Sanz toy, c’est verité,
                        Me puis chevir, toy non. Or t’en remambre.
                        De ce soufrir ont la proprieté
                        Mars, avril, may, juing, juil, aoust, septembre.

30                    Meres des mers suy, dicte Marion.
                        Je te soustien, qui bien le scet enquerre.
                        L’esperit Dieu fist sur oy sa maison,
                        Avant qu’il fust ne lune ne soulerre :
                        Le ciel n’estoit, ne terre ne clarté.
35                    Son esperit sur les eaues porté
                        Fut a ce temps qu’il vous fist et tout gendre.
                        Depuis vindrent par leur subtilité

                        Mars, avril, may, juing, juil, aoust, septembre.
                        Se les gens font aux terres desraison
40                    Et guerre entr’eulx, se li uns l’autre enserre,
                        Tue ou mourdrist, pas n’en suy achoison :
                        A toutes gens est commune ma serre,
                        Aux terres doing tous poissons a plenté.
                        Je ne toulz riens, mais je suis en fierté
45                    Octob., novem., janvier, fevrier, decembre,
                        Fuy moy adonc. Quier lors pour ta santé
                        Mars, avril, may, juing, juil, aoust, septembre.

                        L’envoy

                        Terre, les vens, yvers et leur durté                                                   308d
                        En ces cinq mois font maint grant vessel fendre,
50                    Perdre et perir. Pran le temps de purté :
                        Mars, avril, may, juing, juil, aoust, septembre.