Chançon royal 123 : Lasse ! Je sui hastive Voulenté (MCLVI)
Autre balade
― Lasse ! Je sui hastive Voulenté 307a
Qui viens a vous, saige dame Raison,
Pour un arbre que j’avoie planté
Et commencié a faire une maison.
5 A l’eslever ay ja mis grant foison,
Mais mon arbre voy seichier et perir.
Par la maison voy les eaues ferir
Et empirier trop fort le fondement,
Ne je ne puis l’edifice acomplir
10 Par le deffault d’emprandre saigement.
― Dy, en quel temps as tu ton arbre anté ?
― Au moys d’aoust, ou cuer de la moisson.
― Et ta maison, se Dieux te doit santé ?
― En decembre. ― C’est tout hors de saison.
15 Par quel conseil ? ― Par Fole Opinion.
Qui m’acorda ce que je voulz querir.
― Tu diz bien voir. Nulz homs ne doit ouvrir
Terre en Aoust pour enter nullement,
Car Nature ne le pourroit nourrir,
20 Par le default d’emprandre saignement.
Car le souleil laisse lors sa clarté
Et fait adonc froide la region.
Quant la terre a fruit et fueille porté,
Humeur deffault, trop pou d’ahercion
25 Fait [fueille] au fust, c’est sa perdicion.
L’ente ne puet lors a grant fruit venir,
C’est ce qui fait ton arbre deffenir.
Tu doiz enter en Mars, non autrement.
A trop de gens puet moult mesavenir
30 Par le default d’emprandre saigement.
Edifier hors du temps de l’esté
Et en l’iver est fole entencion :
Les fondemens sont emplus et gasté.
Qui dessus fait edificacion
35 Ses mises pert, et s’inundacion
D’eaue ou de vent vient, tout verras cheir. 307b
Tu le puéz bien par toy meismes veir :
Mars et avril est le commencement
D’edifier : or te voy esbahir
40 Par le default d’emprandre saigement.
N’empran jamais rien par hastiveté,
Sanz bon advis et sanz mon achoison.
Regarde au temps de famine ou plenté,
De moiste ou sec, voy la conclusion,
45 Pense a la fin de l’operacion
Que faire veulz, s’il se puet soustenir,
Ains commencer t’en vueille souvenir.
Si ne feras jamais riens folement,
Car tous maulx voy en tous cas advenir
50 Par le dfault d’emprandre saigement.
L’envoy
Princes, vueillies a ces poins advertir,
Car du nouvel et du viéz Testament
Mains grans seigneurs faillu perdre et mourir
Par le default d’emprandre saigement.