Chançon royal 120 : Se Dieux qui a ordonnee justice (MCXXVI)
Balade
Se Dieux qui a ordonnee justice,
Droit et raison, et loy estre gardee,
Et qui en tous pugnit pechié et vice
Et veult aux bons merite estre donnee,
5 Toute bonté estre guerredonnee
Et mal pugni, donnoit aux mauvés bien,
Perseverans sanz repentir en rien,
Et aux joustes donnoit tourment et paine,
Tout mal seroit, mais le contraire tien :
10 Chascuns ara sa desserte certaine ! 299b
Combien que maint, chascun en son office,
N’ait pas en soy charité ordonnee,
Pité ne foy, mais orgueil et malice
En convoitant chose desordonnee,
15 Terre d’autrui, et qu’Envie soit nee
Au temps qui court entre maint chrestien,
Toutesvoie, qui s’adviseroit bien
En repentant et prenant vie saine,
Crians : ― merci, Dieu, pardon ne retien.
20 Chascun ara sa desserte certaine !
Or advisons les faiz l’Apocalipce[1],
Les figures dont elle est figuree,
Les promesses faictes en Levitice,
Comment la paix fut aux hommes donnee
25 De bon vouloir, se la loy est gardee
De Jhesucrist, comme nostre ancien
La garderent, s’il est nul arrien
Et se chascun s’en va la voie plaine
Sanz forvoier. Usons de bon merrien,
30 Chascuns ara sa desserte certaine !
Trop a doubter font nostre malefice,
Ce que la char est trop habandonee
A tous deliz, sans avoir frain ne lice,
Paour de Dieu, ne a la mort pensee
35 N’a nostre foy d’estre l’ame dampnee,
Ne de querir prestre phisicien
Pour confesser. L’autre veult o[2] le sien
Maint au jour d’uy, qui de dampner se paine.
Folie fait. Ostent le foul lien :
40 Chascuns ara sa desserte certaine !
Et pour ce que de tous biens est esclipce
Ne sçay se Dieux, par priere eslevee
D’aucun juste, voulroit estre propice,
Que bonne paix fust partout reformee 299c
45 En l’Eglise qui tant est divisee
Entre les roys, de quoy je doubte et crien
Pour les pechiéz du peuple terrient
Et des princes et voulenté mondaine :
Advisons donc tuit a nostre maintien,
50 Chascun ara sa desserte certaine !
L’envoy
Prince, de Dieu doit l’ire estre doubtee :
Il seufre un temps et puis venge a l’espee
Tous les pechiéz par vengence soudaine.
Laissons orgueil, soit vertu eslevee,
55 Amour, pitié, humilité amee :
Chascun ara sa desserte certaine !
[1] Ms. de lapocalipce
[2] Ms. avec