Chançon royal 118 : Eaues courans et de pluseurs ruisseaulx (MCIII)
Chançon royal
Eaues courans et de pluseurs ruisseaulx
Firent un lac si grant en un pais
Qu’il se peuple de lus et de carreaulx,
Carpes, bresmes, d’autres poissons de pris.
5 De la terre a le seigneur le lac pris
Comme le sien et son propre heritaige,
D’entour deffent l’eaue et le pasturage
A tous bestaulx, et aux gens le peschier,
Pour ce qu’il n’est tresor qui par oultrage
10 N’eaue si grant ne se puist espuisier.
Ce riche lac qui tant yert bons et beaux
Fut du seigneur et du peuple chieris
Et deffendu de loustres et d’oiseaulx,
Et les poissons furent la bien nourris.
15 Nulz n’y pescha, fors le seigneur, toudis
A plaine eaue, sanz rompre le rivage.
Estat moien en tenoit comme saige
Sanz le vouloir par excés effruitier,
Pour ce qu’il n’es tresor qui par oultraige
20 N’eaue si grant ne se puise espuisier.
Long temps vesquit en la grace de ciaulx
Qui a ce temps estoient ses sugis.
Aprés mourir[1], lors vint uns jouvenciaulx
Qui ne ce lac a tant de pescheurs mis
25 Que les poissons ont esté afoiblis.
De son propre a fait ainsi ocmme usaige
Tant qu’il ne puet reparer son dommaige :
Mais li convient estat amenuisier,
Pour ce qu’il n’est tresor qui par oultraige 292c
30 N’eaue si grant nese puist espuisier.
Et qui pis est, au lac vont les pourceaulx
Qui l’ont gasté, et tout par leur fouillis,
Et pluseurs gens l’espuisent a vaisseaulx :
L’eaue s’en fuit, ailleurs va le sourdis,
35 La chaucee est detruitte et le hourdis,
Tarir le fault. Maint y prannent herbaige,
Et le loutrier en emprunte sur gaige,
Ce que ne fist onques son devancier,
Pour ce qu’il n’est tresor qui par oultraige
40 N’eaue si grant ne se puist espuisier.
Les loustres vont querre carpes, barbeaulx,
La vont peschier les herons blans et bis,
Amaigriéz sont tanches et luciaux,
Li blans poissons de rossaille[2] est peris,
45 Lus et carreaulx s’estrangleront tous vis.
Le peuple mort, et li oisel sauvaige,
Loustres aussi mourront de male rage.
Si feroit bon sur ces poins adviser,
Pour ce qu’il n’est tresor qui par oultrage
50 N’eaue si grant ne se puist espuisier.
L’envoy
Prince, bon fait retenir gens loyaulx
Et qu’om garde son peuple et ses feaulx
Sanz jeunement par jeunesce exillier.
Car Roboam par les jeunes consaulx
55 Perdit pais, sa terre et ses vaisseaulx
Qui en tel cas se perdent de legier,
Par folie, par cuidier, par oultraige
Que chascun doit hair et desprisier,
Pour ce qu’il n’est tresor qui par oultraige
60 N’eaue si grant ne se puist espuisier.
[1] Saint Hilaire corrige en mouru
[2] Saint Hilaire corrige en rascaille
