Chançon royal 117 : En un pais avoit une fontaine (MLXXXVII)
Chançon royal
En un pais avoit une fontaine
Qui tant par lui comme par ses ruisseaulx,
Habondamment faisoit la terre plaine
D’erbes, de grains, de vins, de fruiz nouveaux,
5 De volailles, de bestes et d’oiseaulx,
Et pour ce estoit de grant peuple peuplee,
Franche en tous cas, en justice gardee, 287c
De grant rneom, doubtant Dieu, mais la tesche
De convoiter et pechier l’a gastee,
10 Car Dieu partout pugnit peuple qui peche
Par long temps fut la la demeure saine,
Aux estrangiers estoit le pais beaux,
Pour ce que loy s’i gardoit souveraine,
Foy et amour, humilité entréiaulx.
15 Chascuns l’ama. Paix, festes et reviaulx
Regnoit adonc. La terre fut doubtee
Et d’elle aussi mainte autre conquestee.
Mais ce conquest pieça deffault et seche
Par l’ire Dieu qui est sur eulx tournee,
20 Car Dieu partout pugnit peuple qui peche.
Pour ce qu’en temps qu’ilz orent grant demaine,
Pechié de char et orgueil vint en eaulx,
Haine aussi, division mondaine,
Convoitise, tous vices desloyaulx,
25 Despiter Dieu, destruire[1] gens loyaulx.
Justice et loy fut par eulx defoulee,
Et Dieu leur a grant guerre suscitee
Qui tous mauvais en leur pais alesche,
Leur chief soubmet et destruit leur contree :
30 Car Dieu partout pugnit peuple qui peche.
Par sang crueux, non pas extrait de vaine,
Donne leurs chars aux champs et leurs boyaulx,
Mors et occis, par vengence soudaine,
Viande aux loups, aux chiens et aux pourceaulx.
35 Commocions entre les jouvenceaulx
Et le peuple est par division nee.
Du pere au fil est traison trouvee,
Le feu se met partout, par ardant mesche,
Et l’Eglise est polute et violee,
40 Car Dieu partout pugnit peuple qui peche.
Franchise fault, car l’eaue premeraine 287d
Se prant et vent en trop divers vaisseaulx,
Dont les brebis deffaillent de leur laine,
Des prez, des blez descroissent les monceaulx.
45 Le labour fault, car ne sçay quelz louviaux.
Ont trop celle eaue et sa vois estoupee.
Courir ne puet, tout va a la hapee
Si qu’en brief temps ne sera buef a creche :
Dont l’en verra seignourie muee,
50 Car Dieu partout pugnit peuple qui peche.
L’envoy
Prince mondain, soit ceste eaue avisee
Et franchement au peuple divisee.
S’il se repent, nul du mal ne s’entesche.
Amour, pité soit en nos cuers fichee.
55 Courons a Dieu de cuer et de pensee,
Car Dieu partout pugnit peuple qui peche.
[1] Ms. destruit
