Chançon royal 114 : Puis que Religon cessa (MXII)
Balade qui parle sur l’estat de religion
Puis que Religon cessa,
Et que prestre furent mondain,
Et que l’Eglise delaissa
L’estat, Pierre son souverain,
5 Symon, Giézi vint en sa main 266d
Qui lui aprinst a marchander.
Adonc prinst le peuple a errer,
Haines et guerres mouvoir
Entre les princes, c’est tout cler :
10 Mal chief fait les membres doloir.
Depuis .lx. ans en ença
Convoitise a mis son levain
A la court Dieu, tant que pieça
Bon clerc y sont alé en vain.
15 Science en est mise a l’estrain,
Les nonsaichans voit on lever
Par faveur, promettre ou donner,
Les bons n’y puelent riens avoir,
Science et foy en fault cesser :
20 Mal chief fait les membres doloir.
De dolente heure s’avança
Cilz qui pestrit aux gens tel pain,
Dont division commença
Tant que nostre loy tout a plain
25 Est en grant cisme et grant desdain.
Deux pappes se font aourer
Dont il ne deust c’un seul regner.
Que ne font les roys leur devoir
D’un concille pour ce trouver ?
30 Mal chief fait les membres doloir.
Qui deux elections pensa,
D’Antecrist fut l’un, pour certain.
Se la vraie par lui faussa,
Il nous germa perilleus grain.
35 Colleges, n’attendéz demain,
Estudes, vous deussiéz aler
Devers le roy pour enhorter
Ce concille, et cerchier le voir
Pour si grant erreur rappeller :
40 Mal chief fait les membres doloir. 267a
Car tout se destruit ça et la.
Enpereurs, roys, noble, villain
Ont pour ce guerre. Or y parra.
Que feront François et Rommain,
45 Alemant et Oultremontain,
Tous clercs deça et dela mer.
Crestiens estes, c’est amer.
Faictes un vray pappe apparoir
Et par concile declarer :
50 Mal chief fait les membres doloir.
L’envoy
Empereurs, roys, ducs, conte, per,
Colleges, estudes non per,
Faictes ce cisme remouvoir
Et par raison determiner
55 Un seul pappe, ou tout voy finer :
Mal chief fait les membres doloir.
