Chançon royal 113 : Je voy faire a tout animal (MXI)
Balade comment les bestes ensuivent mieulx leur loy et congnoissent leur nature que les hommes
Je voy faire a tout animal 266b
Ce que Nature lui ensaigne
Fors qu’a homme, qui suist tout mal
Et de son sens ouvrer ne daingne.
5 C’est bien raison qu’elle s’en plaingne,
Car l’omme fait tout arrebours.
Beste devient, singes et ours,
Et quant il doit dormir, il veille.
Muyaux est, aveugles et sours :
10 Du temps qui court ay grant merveille.
Pappe n’y a ne cardinal
Qui pour prandre la croix ne faingne,
Et li grant prince imperial
Ne veulent porter autre ensaingne.
15 Convoitise a noble compaigne,
Orgueil va avec li es cours,
Qui fait aux conseilliers secours.
Faulx Semblant aussi les conseille.
La fait on de merveilleus tours :
20 Du temps qui court ay grant merveille.
Il n’est mais point d’estat royal
Tel comme portoit Charlemaine,
Ne de conseil juste et loyal
Qui les maulx des princes repra[i]ngne.
25 Je ne sçay homme qui Dieu craingne.
Il n’est vertus ne bonnes mours
Es grans, es moyens, es menours.
Justice dort, Raison sommeille,
Pité, Loy ne regne n’Amours :
30 Du temps qui court ay grant merveille.
Il ne chaut du bien communal.
Pour ce convient que mal nous vaingne. 266c
Tout est reversé contreval,
On porte une aune de poulaine,
35 Et, qui pis est, chascuns se paine
De porter habis si trescours
Que l’en voit les culs tous les jours
De pluseurs. Ainsis s’appareille
Nostre fin, nos cris et noz plours :
40 Du temps qui court ay grant merveille.
Tous vices sont en general,
Mais vertus n’est qu’a nous remaigne.
Chascuns veult avoir grant cheval
Et grant estat, ou qu’om le praingne.
45 Povreté le peuple mehaigne.
Si faulra cesser telz atours.
Penséz de vos brebis, pastours,
Qui ont les loups prés de l’oreille,
Ou avoir n’y pourréz recours :
50 Du temps qui court ay grant merveille.
L’envoy
Prince, Congnoissance est la flours
D’amer Dieu, Vaillance et Honnours
Et Raison[1] qui n’a sa pareille.
Prenéz les com vos ancesours
55 Firent. Par eulx seréz ressours :
Du temps qui court ay grant merveille.
[1] Ms. Roison