Chançon royal 112 : Du temps que nature repose (MX)

L’envoy[1]

                        Du temps que nature repose                                                             265d
                        Et que les sens sont endormis,
                        M’apparut merveilleuse chose
                        En songant, ce m’estoit advis,
5                      Car je veoie vis a vis[2]
                        Folie qui le Sens tençoit
                        Et d’aler devant s’efforçoit.
                        A courre ont grant gaigement mis.
                        Et court chascun mieulx qu’il pouoit.
10                    Voulenté juga et le Temps
                        Qu’a la course, si comme on voit,
                        La folie passe le Sens.

                        Et adonques le Sens oppose
                        A voulenté : ― Vous avéz mis
15                    Le Temps contre moy. Si suppose
                        Vous deux de Folie estre amis.
                        En un autre temps fut[3] tramis
                        Que Drois et Raisons m’onnouroit,
                        Et Justice et Loy me gardoit
20                    De la main de mes ennemis.
                        […]
                        […][4]
                        Folie monstrer ne s’osoit :
                        La Folie passe le Sens.

25                    Et encor puis je mettre glose
                        Que de courre ne suy remis,
                        Mais nulz de mon fait parler n’ose.
                        Si suy je, long tems a, escrips
                        Avant que regnast Jhesu Cris.
30                    Chevalerie me suioit,
                        Clergie aussi et gouvernoit
                        Les .vii. ars qui seront faillis
                        Pour ce qu’om ne fait ce qu’om doit,
                        Et qu’il es trop de jeusnes gens
35                    Des quelz, chascuns en son endroit,
                        La Folie passe le Sens.                                                                        266a

                        Chascuns scet bien, pour ce le pose,
                        Que depuis que je fu desmis
                        Es livres es quelz je repose,
40                    Et que des princes fu hais,
                        Royaume ont esté envahis,
                        Ou Voulonté regne pour Droit
                        Et Convoitise qui vouldroit
                        Que je fusse escorchiéz tous vis.
45                    Par or et argent tout deçoit
                        L’Eglise, chevaliers, enfans,
                        Et pour ce, qui bien s’i congnoit,
                        La Folie passe le Sens.

                        Qui voulra, si me tance ou chose,
50                    Car Salemons, li roys Davis,
                        En mainte escripture et en prose
                        Firent par moy livres et dis,
                        Dont les corps et les esperis
                        Et chascun qui leurs mos orroit
55                    Et qui encor les retendroit
                        En pourroit monter en hault pris.
                        Mais Foul Plaisir ne le vouldroit
                        Ne Volunté contredisans
                        A tout bien, qui lors s’escrioit :
60                    ― La Folie passe le Sens.

                        L’envoy

                        Prince, en resveillant pour le froit,
                        Fut mon couraige moult destroit.
                        Et de ce songe esbahissans,
                        Doubtans en fin qu’il en seroit,
65                    Nul bien n’y sçay. En Dieu en soit !
                        La Folie passe le Sens.

[1] Saint Hilaire corrige en Balade

[2] Ms. advis

[3] Saint Hilaire corrige en fu

[4] Vers manquants