Chançon royal 111 : Entre Espargnay et Damery (MIX)
Autre Balade sur pastours qui estoient entre Damery et Espargnay
Entre Espargnay et Damery
Vi pastoures et pastoureaulx
En la praerie pres d’Ay,
Gardans moutons, vaches et veaulx :
5 Dont Lohiers disoit a l’un d’yaulx :
― Je vueil chevauchier sur les champs,
Car bergiers ne sont que meschans
Tant comme ilz gardent les moutons.
Pains bis, prunelles et boutons,
10 Frommaige et let est leur deduit.
Je te pri que nous nous armons :
Qui voit gens arméz, chascun fuit.
Ne voiz tu pas devers Cheoilly
Varléz arméz a grans tropiaulx,
15 Qui sont de poulaille garny,
Et tuent brebis pour les piaulx,
Qui robent et font leurs aviaulx,
Destellent chevaulx et jumans,
Et dient qu’ilz viennent du Mans,
20 Et vont logier emprés Chaalons ?
Laisse tout. Aprés eulx alons.
Telz gens sanz paine ont leur pain cuit.
Nous ferons quanque nous voulrons :
Qui voit gens arméz, chascun fuit.
25 ― Voire, mais sçavoir vueil de ty,
Sotart, se nulz a guerre a yaulx, 265c
Et ou ilz vont. Or le me di.
― En Alemaigne yert leur cembieux.
La se trairont les damoiseaulx
30 Sur le pais des Allemans
Pour guerroier. ― Certes, tu mans :
Leurs ennemis sont trop felons.
A leurs amis, qui leur sont bons,
Chascuns de ces gens d’armes nuit.
35 N’y demeure oe ne chapons :
Qui voit gens arméz, chascun fuit.
C’est bien drois : car fait d’ennemi
Font, prannent vaches et pourceaulx.
Lors dist Guichart : ― C’est tout honny :
40 Mal temps ont moutons et aigneaulx.
Larrons regnent et larronciaulx,
Destruiseurs du monde et gourmans.
De mains pais ribauls, truans,
S’arment, savetiers et chartons.
45 Escuiers s’appellent garçons
Et pillent de jour et de nuit.
Dieu paiera tout. Or les laissons :
Qui voit genz arméz, chascuns fuit.
― Gardons noz vestes, je vous pri,
50 Soions prodomes, dist Ayaux,
Qu’avant qu’il soit la saint Remy,
Maint seront occis de cousteaulx
Ou panduz par juges royaulx
Pour leurs meffaiz qui sont trop grans.
55 Ainsis ne guerria Rolans,
Charles, Artus ne les barons
Dont les grans histoires avons,
Par les quelz l’Eglise reluit.
L’en gaste tout, en gré prenons :
60 Qui voit genz arméz, chascun fuit.