Chançon royal 110 : Compains, compains, triste te voy (MVII)
Balade sur l’estat de cest monde
― Compains, compains, triste te voy.
Or me dy, pour Dieu, que tu as ?
― Ce ne te sera fors annoy,
Mais neantmoins tu le sçaras :
5 Je voy les bons seoir au bas,
Les vaillans povres souffraitteus,
Les saiges prodommes honteus,
Reboutéz de l’onnour mondaine,
Je ne ne voy nul cuer piteux :
10 Ainsis cilz mondes se demaine.
Encor m’est pis, que j’apperçoy
Que ceuls qui sont pour servir las
Loyaument et en bonne foy
Et longuement, sont povre et cas,
15 Et que les nouveaux ont a tas
L’or et l’argent et sont entr’eulx
Pour leur grace presumptueux, 264d
Que foul plaisir sanz raison maine
Trop avant. S’en suy dolereux
20 Ainsi cilz mondes se demaine,
Duquel trop petit me congnoy,
Ne je voy que noise et debas,
Envie regner, et la loy
En volunté jugier les cas.
25 Justice faint, les advocas
Soustiennent procés merveilleux.
Toutes les gens sont convoiteux,
Chevalerie est incertaine,
Aux grans cours fait trop perilleux :
30 Ainsis cilz mondes se demaine.
Je voy chascun estre a par soy
Et trop acroistre les estas,
Le bien commun en petit ploy.
Amour voy de chiens et de chas.
35 Chascun s’avance a son pourchas,
Cilz qui scet demeure tous seulz.
Pour ce est le monde soufraiteux,
Ne nulz n’y prant la voie saine
De congnoistre les vertueux :
40 Ainsi cilz mondes se demaine.
― Ne t’en chaille, vif en recoy,
Pran en gré ce que tu aras,
De souffisance fay octroy
A ton cueur [et] riches seras,
45 Loe Dieu, envie n’aras.
Vains sont tous ces biens temporeux,
Faulx, decourables, perilleux,
Qu’om acquiert a dueil et a paine,
Qui les maulx [en]suivent tous seulx :
50 Ainsis cilz mondes se demaine.
L’envoy
― Treschiers sires, je recongnoy 265a
Vostre bien et vostre chastoy.
Dieu vous doint sa paix souveraine
Et que garder puisse la loy.
55 Au secle n’a amour ne foy.
Ainsis cilz mondes se demaine.