Chançon royal 109 : Ilz sont deux cours en general (DCCCCLXXI)
Autre Balade sur la court celestial
Ilz sont deux cours en general
Et les branches qui s’en despendent,
Et une court celestial
A laquele pou de gens tendent :
5 Les deux aucune foiz se vendent
Dont l’ame est en enfer vendue,
Et par l’autre est gloire rendue
A ceulx qui en faiz et en dis
Et en bien penser ont tendue :
10 C’est li regnes de paradis.
L’une des cours ou sont ly mal
Est mondaine, ou les vices chantent.
La sont .vii. pechiéz capital
Qui par tous les servens s’estendent.
15 A la seconde court se vendent
Les biens de Dieu par retenue.
Saige personne povre et nue
Ne bons clercs n’y seront meris.
La joie est de tel court perdue :
20 C’est ly regnes de paradis.
Li bailli, li official, 254b
Ausquelz prince et prelat s’attendent,
Prevost, conseillier, curial,
Les droiz civilz les lois estranglent,
25 Les canons arrebours entendent.
Le bien commun de doleur sue,
Lerres vit et prodoms essue
Par le jugement des chetis.
Privéz sont de ciel et de nue :
30 C’est ly regnes de paradis.
Ce sont li prince Belial
Qui mal pour bien aux justes rendent,
Ce sont li juges desloial
Qui Susanne pour ardoir prandent,
35 Ce sont ceuls qui les bons tourmentent
Et qui preparent la venue
D’Antecrist, quant tout droit se mue.
Par convoitier les biens fuitis,
En perdent la gloire congneue :
40 C’est li regnes de paradis.
O saincte court, juste et loyal,
Que les sains et les sainctes sentent !
La sont li ordre angelical
Et ceuls qui a bien faire entendent,
45 Les bons trespasséz qui te tendent
Les mains, qui ont voie tenue
Selon Dieu. Grant desconvenue
Venrra aux dolens esperis
Qui aront ta gloire incongnue :
50 C’est ly regnes de paradis.
L’envoy
Prince, la tierce court cremue 254c
C’est la court dieu qui nous argue
De noz maulx. Ostons ces perils,
Faisons que mal en bien se mue,
55 Prenons ce qui tout esvertue :
C’est li regnes de paradis.
