Chançon royal 108 : En une selle a chevauchier (DCCCCLXV)
Autre Balade
En une selle a chevauchier,
Quant elle a couru longuement,
Fault tousjours pannel ou estrier,
Tasse, boucle, espingle ou mordant,
5 Contrecengle, autre accident,
Clou, martel, poinçon ou lasniere,
Cengle, poitral ou estriviere,
Couverture ou chose nouvelle.
Jamais ne sera bien entiere :
10 Tousjours fault ouvrer en vielz[1] selle.
Porter la fault au bourrelier
Pour rembourrer communement 252b
Et pour l’arçon qui veult briser,
Et les auvres semblablement.
15 Elle loche, elle se desment,
Ataiches y fault et cuilliere,
Rembourrer devant ou derriere,
D’un lez ou de l’autre chancelle,
Tant qu’elle chiet en la pouldriere :
20 Toudis fault ouvrer en viéz selle.
Ainsis fault il, a droit jugier,
En viel homme ouvrer trop souvent.
Un[e] heure commence a clochier
Pour goutes qui le vont tenant,
25 Autre froiz la teste lui fent
De doleur, lors fait mate chiere.
Autre heure gist sur la litiere
Pour le grief mal de sa forcelle.
Lors n’est remede qu’il ne quiere :
30 Toudis fault ouvrer en vielz[2] selle.
Mal a es dens, ne puet mengier,
En son dos seufre grief tourment,
Or le fault adonques vuidier,
Le medicin avoir present.
35 Le costé d’angoisse li fent,
Si fault[3] pour purgier la matere
Boire poison, prandre cristere,
Et quant la lune renouvelle,
On le voit bien a sa maniere :
40 Toudis fault ouvrer en vielz[4] selle.
Ainsi vit viellesce en dangier
De phisique ou elle s’attent,
Dont elle a chascun jour mestier,
Qui sont corps lui va rembourant.
45 De ses excés la paine rent,
Elle default de sa lumiere,
En defaillant court a sa biere, 252c
En cendre chiet comme estincelle,
Tant soit homme de fort perriere :
50 Toudis fault ouvrer en viéz selle.
L’envoy
Prince, il n’est nulle rien vivant
Qui ne muire, et par consequant
Perilleuse est nostre nasselle.
Si tost que viellesce nous prant,
55 Tousjours avons un fer lochant
Toudis fault ouvrer en viéz selle.
[1] Saint Hilaire corrige en viéz.
[2] Saint Hilaire corrige en viéz.
[3] Ms. faut il
[4] Saint Hilaire corrige en viéz.