Chançon royal 107 : Bien me souvient de la mutacion (DCCCCLXI)
Balade faicte par Eustace sur la mutacion du ciel et de la terre et comment lucifer trebucha en enfer par son orgueil et grant presumpcion
Double chançon royal
Bien me souvient de la mutacion
De terre et ciel, de la forme angelique
Et de l’orgueil et grant presumpcion
De Lucifer, qui devint diable inique
5 Par son pechié : je recors la fabrique
Faicte de[1] Adam, no pere premerain,
Par le vray Dieu, et de sa femme Evain,
Qu’il mist tous deux en paradis terrestre
Qu’ilz perdirent par leur pechié villain :
10 Je, Memoire, sçay ce que Dieu fist estre.
De deluge la persecucion,
Du temps Noé et son arche authentique
Dont le monde ot sa renovacion
Par ses enfans, habitans en publique,
15 Qui puis tindrent Ayse, Europe et Aufrique.
Sem, Cham, Japhet. Chascun d’eulx pour certain
L’une des trois possida en sa main
Avec sa gent, quant confusion nestre
En Babilon voult, et par cas soudain :
20 Je, Memoire, sçay ce que Dieu fist estre.
Lors fu faicte la separacion
Des lignies. Chascun sa langue applique
A une part et dominacion.
L’un sur l’autre regna par voie oblique.
25 Les .vii. ars puis, chascun en sa pratique. 250d
Nembroth [le] grant fut seigneur premerain,
Grant et corsu, de toute fierté plain
Villes ferma, de son peuple fut maistre,
Lors commença guerre et envie a plain :
30 Je, Memoire, sçay ce que Dieu fist estre.
Les grans guerres, la persecution
Des Troiens, la voie astronomique
D’Alixandre, qui a sa diction
Mist le monde, de la guerre punique
35 Que les Romains firent en Irrilique
Et autre part. Furent seigneur mondain,
Aux provinces mistrent treu et frain.
Tout conquistrent a destre et a senestre.
Puis, par orgueil, ont tout perdu Rommain.
40 Je, Memoire, sçay ce que Dieu fist estre.
D’aage en aage se fist mutacion :
Ducs et meneurs en la voye hebraique.
Abraham ot multiplicacion
De semence, pour sa foy, [et] si que
45 Dieux l’ama moult. Saul phitonique,
Qui rois estoit, voult Dieu tempter en vain,
Dont, lui vivant, David, roy souverain
Fut oint de Dieu, qui par[2] son fruit repaistre
Et rachater voult tout le peuple humain.
50 Je, Memoire, sçay ce que Dieu fist estre.
Les Gaulx avant celle perdicion,
Qui d’Eneas vindrent en Italique,
Afranchirent leur generacion,
Belgues, Seltes, et François Senonique
55 Conquistrent puis le ceptre imperatique.
Clovis, paien, prinst le baptesme saint
De Jhesucrist. Paris d’uy a demain
Par saint Denis prinst la foy vraie et destre.
Charles li grans la garde soir et main :
60 Je, Memoire, sçay ce que Dieu fist estre. 251a
L’Eglise fut lors en devocion,
L’estude ama moult, sa theologique,
Des biens de Dieu ne fist vendicion,
Mais reprenoit l’eresie erratique
65 Des Arriens. A gramaire, a logique,
Et aux bons clers donna prouvende et pain.
Ce la soustint, mais au jour d’ui la plain,
Car de neant fait on prelat et prestre.
Priere[3] et dons destrempent ce levain :
70 Je, Memoire, sçay ce que Dieu fist estre.
Pierres ne Polz n’ont plus audicion,
Ne Jerome li bon bibliothique.
Leur successeur ont autre entencion,
Tous veulent l’or, mais s’il ne sonne et clique,
75 Nul n’aura d’eulz moustiers, baston ne clique,
Car s’il est clerc sanz or, mourra de faim,
Metheode a sur ce dit son refrain :
Antecrist vient pour leurs gueules repaistre !
En l’aage .vii. seront tuit prins a l’ain :
80 Je, Memoire, sçay ce que Dieu fist estre.
Approcher voy toute destruction
Selon la loy et texte euvangelique,
Regnes faillir, amour, dilection,
Humilité, science et rethorique,
85 Congnoissance, la vie politique.
Memoire suis, qui tous ces cas reprain,
Et qui des rois et prelas me complain,
Qui n’ont pas tous les meurs de saint Silvestre.
Leurs faiz mettray en reprouche au derrain :
90 Je, Memoire, sçay ce que Dieu fist estre.
L’envoy
Prince[4] et prelas, aiéz contricion, 251
Le peuple aussi. En emendacion
Vueilléz voz cuers et voz ames repaistre
95 De l’amour Dieu, de[5] sa dilection,
Ou vous seréz mis a dampnacion :
Je, Memoire, sçay ce que Dieu fist estre.
[1] Saint Hilaire corrige en d’
[2] Ms. pour
[3] Ms. Prieres
[4] Ms. Princes
[5] Ms. et de
