Chançon royal 106 : Princes qui veult faire guerre ou voyage (DCCCCLVI)
Princes qui veult faire guerre ou voyage 249a
Ne les doit pas sanz raison entreprandre.
A son conseil doivent estre li saige,
Dire leur doit la fin ou il veult tendre,
5 Le droit qu’il a, ou le desir, d’emprandre,
Pour mieulx avoir deliberacion
Se faire ou non doit son intencion,
Se la cause est et la poursuite bonne,
S’il puet fournir sa prosecution :
10 Advise cy toute noble personne.
Qu’il aime Dieu et craingne en son couraige,
Croye conseil ou il se doye attendre,
Et, se cause a, advise a son passaige,
Ait gent expers, nombre ne grant ne mendre
15 Qui puist souffrir sanz riens tolir ne prendre
Des biens d’autruy, querre temps et saison
Convenables, vivres, provision,
Aliances, vesseaulx, promette, donne.
S’autrement fait, c’est sa perdicion.
20 Advise cy toute noble personne.
Ait de paier et d’estre brief l’usaige,
Diligens soit, a beau parler doit tendre,
Justice avoir pour oster son dommaige,
A obeir face tout homme entendre.
25 Car sanz ce point a l’en veu descendre
Maint ost et gent a grant confusion,
Que mendres d’eulx, par leur division,
Ont subjuguéz, et roy portant couronne
Prins et occis, destruit sa region :
30 Advise cy toute noble personne.
Querre de loing finance et queriage,
Armes, chevaulx, gens aprins pour apprendre
Ceulx qui menrront le charroy, le sommaige,
Vaiches et buefs, qu’om ne les puist sousprendre.
35 Face un seul chief et a [i]cellui rendre 249b
Droit d’obeir sur mort d’occision,
Escoutes, guet. Estre en bonne union,
Bien obeir mainte victoire donne,
Haster son fait sanz dilatation[1].
40 Advise cy toute noble personne.
Et se droit n’a d’achat ou d’eritaige,
Ou de vray don pour noblesce de gendre,
Pour corps puissant, pour son roial linaige,
Pour son avoir qui tout devenrra cendre,
45 Pour volunté ne doit vers Dieu mesprendre,
Pour convoiter autruy possession
Contre les gens de sa religion.
Sur Sarrasins de guerroier s’ordonne.
Faire le puet et ailleurs par raison.
50 Advise cy toute noble personne.
L’envoy
Prince, je tien pour ma conclusion
Qu’on doit avoir de maint l’opinion
Sur les grans faiz avant qu’on s’abandonne,
De son vouloir faire execusion.
55 Venir en puet trop grant destruction.
Advise cy toute noble personne.
[1] Ms. delectation ; Saint Hilaire corrige en dilatacion