Chançon royal 105 : Monstre horrible fut de Minotaurus (DCCCCLV)

Autre Balade parlant d’un monstre nommé Minotaurus

                        Monstre horrible fut de Minotaurus
                        Qui .ii. formes oit en un mesme corps,
                        Homme et toreau, et pour ce Dedalus
                        En sa maison qu’il fist l’enferma lors,
5                      Que veu ne fust. Mais un monstre plus fors
                        Est au jour d’ui : c’est un corps a deux testes
                        Voulans regner sur raisonnables bestes
                        Dont les membres sont en division,
                        Qui a un seul fussent d’obeir prestes,
10                    Qui voulsist bien cette conclusion.

                        Qui est cilz corps qui est ainsi confus ?
                        C’est l’Eglise dont les membres sont tors,
                        Qui .ii. chiefs a, et ces membres ça jus
                        Sont les prelas, pueples et gens dehors,
15                    Qui .ii. chiefs ont, par convoiteux descors,
                        Ou un seul chief deust gouverner. Honnestes
                        Vicaire Dieu com saint Pierre, li prestres,
                        Fut de par lui par saincte election
                        Et encor[1] fust sanz os et sanz arestes,
20                    Qui voulsist bien ceste conclusion.

                        S’un corps humain sur terre descendus
                        Avoit deux chiefs, moult seroit vilz et ors.
                        Quant il est nez, est pour monstre tenus,                                        248d
                        Aussi seroit une vache ou uns pors.
25                    Un chief soufist, et quant je me recors
                        C’uns seul papes doit este magnifestes
                        Sur son tropel, se deux sont, deshonnestes
                        Et injustes est l’un d’eulx par raison.
                        Dont tel erreur fust pieça osté presques,
30                    Qui voulsist bien ceste conclusion.

                        Par ce cisme est tout li mondes perdus,
                        Guerre en descent entre foibles et fors.
                        En grant peril sont[2] prestres et tondus
                        Faiz a ce temps. Ayons nostre remors
35                    Aux sacremens, aux effects, aux effors
                        Des unctions, des ordres, des baptesmes,
                        Des beneiçons, des huiles et des cresmes,
                        Et au peril de la dampnacion
                        Des nez. En ce pourveu fust evesques
40                    Qui voulsist bien ceste conclusion !

                        Pour ce, princes terriens, je conclus,
                        Et vous, prelaz, que vous mettéz defors
                        Ce monstre ci : faittes[3] qu’il soit intrus
                        Et enferméz, tant que par saint acors
45                    Des saiges clers vous aiéz les recors
                        Qu’il doit regner un seul vray, et vous, prestres.
                        Et sanz faveur soit tenu chemins destres
                        Pour remettre l’Eglise en union
                        Qui fust pieça hors des chemins senestres,
50                    Qui voulsist bien ceste conclusion.

                        L’envoy

                        Roy, sur les roys trescrestiens tenus,
                        Soit ce chemin d’entrechier soustenus
                        La verité du vray opinion,
                        Que telz cismes ne soit plus maintenus,
55                    Qui fust pieça de tous poins abatus,
                        Qui voulsist bien ceste conclusion.

[1] Ms. encores

[2] Ms. en sont

[3] Ms. et faittes