Chançon royal 104 : Je ne voy estat qui n’excede (DCCCCXL)
Autre Balade
Je ne voy estat qui ne[1] excede
En nombre, en gaiges, et en drois.
Tout par convoitise procede : 244c
Et que n’y advisent les roys ?
5 En leurs terres .vi. sont pour troys
Officiers, [et] qui n’y font rien.
Ramenons le temps ancien,
Car trop sont excessif li gaige.
Faisons com bon phisicien,
10 Restraingnons : si ferons que saige.
Querons a ce mal brief remede
Ou il nous sera trop destrois,
Car le nom de richesce cede
Par excés les biens des François
15 A povreté, car drois ne loys
N’ont effect, ne ceuls qui font bien.
L’en fait plant de chetif merrien
Et prant chascun de roy l’usaige
En estat, sanz vivre du sien :
20 Restraingnons : si ferons que saige.
Car le bien commun que l’en prede
Pour telz estas, souventefois
Fait que nostre sire concede
Pugnicion, et que la voix
25 Des povres gens destruis et frois
Est oye ou trone[2] moyen.
Sommes nous juifs ou crestien ?
Souffise nous nostre heritaige
Sanz prandre convoiteus lien :
30 Restraingnons : si ferons que saige.
En mainte omelie dit Bede
Que chascun doit oster ses dois
Et se oeulx du dolent esclede,
D’atouchier l’or, car c’est un bois
35 Ou les diables tendent leurs rois
Pour les convoiteux, qui au chien
Sont comparéz, d’orgueil prochien,
Prandre et ravir a leur passaige. 244d
Donc, se ces poins advisons bien
40 Restraingnons : si ferons que saige.
Par convoiter se perdit Mede,
Par orgueil finerent Gregois,
Par trop grans estas li Tragede,
Par pechié de char Sodomois,
45 Par chetis le rgne aus Traçois,
Par haine ly Cyprien,
Par envie Italien.
Alons donc contre no dommaige,
Et tuit ly prince terrien :
50 Restraingnons : si ferons que saige.
L’envoy
Prince, les grans gaiges pour mois,
Et ceuls qui ne sont pas adrois
Pour gouverner, don par oultraige
Trop d’officiers [ont] en surcrois,
55 Feront tant que nous n’arons croix :
Restraignon : si ferons que saige.
[1] Saint Hilaire corrige en n’
[2] Ms. tronc
