Chançon royal 100 : Tresdoulz amis, parleréz vous a moy (DCCCCXI)
Autre Balade
― Tresdoulz amis, parleréz vous a moy,
Qui chascun jour sui pour vo fait tancee ?
― Dame, de qui ? ― De mon pere, ma foy,
Qui me met sus que je suis fiancee.
5 ― A qui ? ― A vous. ― Onques n’y oy pensee
Fors par honour, du gré de voz amis.
― Je vous en croy, ma mere m’a amis
Que vous m’avéz baisiee en mi la bouche.
Ce sçavéz vous, ne me chaut de leur dis,
10 Car vostre amour trop fort au cuer me touche.
Mais l’en ma dit de vous je sçay bien quoy,
Pour ce est vers vous ma merre forsenee,
Que vous avéz autre amie en requoy
Dont vous vouléz faire vostre espousee.
15 Je seroie contre raison moquee,
Et bien sçavéz que vous m’avéz promis.
― N’en creéz riens. Ceuls sont mes ennemis
Qui ce dient pour moy faire reprouche.
De voz parlers suis forment esbahis,
20 Car vostre amour trop fort au cuer me touche. 236c
― Puisqu’ainsis est, a vous du tout m’octroy.
Mais fort sera que vous soye donnee
De mes parens, car a chascun dire oy
Que vostre amour est trop habandonnee.
25 Je n’en puis mais, je l’ay belle trouvee.
Se vous este[s] de mon pere escondis,
Maintenéz bien que vostre suis toudis,
Ne vous chaille se pere ou mere grouche.
Au fort diray vous estes mes plevis,
30 Car vostre amour trop fort au cuer me touche.
― En telz dangiers trop petit me congnois,
Ce qui est mien demander ne m’agree.
Ce n’est qu’oneur, voire, mais c’est anoy.
Vostre ami suis et vous estes m’amee.
35 Ja ne vueilléz estre femme clamee,
Car en telz cas est chascuns asservis :
Franche vivéz en amour, je frans vis.
Des mariéz servitute s’aprouche.
― Vous dittes voir, or demourons ainsis,
40 Car vostre amour trop fort au cuer me touche.
L’envoy
Adieu, Picart. ― Adieu, douce Bietrix.
A ce depart fault que je vous atouche.
Baisier vous vueil. Soufrez vous : c’est amis[1],
Car vostre amour trop fort au cuer me touche.
[1] Ms. trop amis