Chançon royal 98 : Dieu gart mon seigneur le bailli ! (DCCCCIX)
Autre Balade
― Dieu gart mon seigneur le bailli ! 235c
― A Dieu[1] soiéz, sire prodoms !
Que vous fault ? Pas n’avéz failli.
― Se vous vouléz. Cy est uns homs,
5 Voire deux, murdriers et larrons,
L’un parmentier a rouge aumusse,
L’autre savetier qui se musse,
Qui jadis firent l’escuier
Et portoient plus d’ostrusse :
10 Donneur leur l’ordre de cordier.
Ceuls m’ont mainte foiz assailli
Et robé poules et chapons.
A pillier ne sont esbahi
Chevaulx, vaches, brebiz, moutons.
15 Or ont prins habiz de chartons[2].
Un temps fut, se leur apparusse,
Que j’eusse un coup sur ma cocusse.
Reprandre leur fault leur mestier,
Mais pour faire nouvelle prusse,
20 Donnéz leur l’ordre du cordier.
― Sergens, aléz prandre celli
A l’aumusse nous le voulons,
Et l’autre pour parler a li.
Ces deux mettéz en noz prinsons.
25 ― Sire Bailli, nous appellons
[…]
[…][3]
De ce grief, comme torturier.
― C’est bien dit, nous y pourverrons[4] :
30 Donnéz leur l’ordre du cordier.
― Or ça, venéz parler a mi.
N’aiéz paour. ― Nous nous doubtons.
― Pourquoy ? ― Veéz la nostre ennemi.
― Dictes voir. ― Chascuns est prodoms.
35 ― Vous mentéz. Tost les gehinons.
― Haro ! ― Qu’as tu ? J’ay pis que puce :
Je muir. ― Dis donc. ― Ha ! saincte Luce !
Certes je suis larron, murdrier. 235d
Bien vouldroie que je mourusse !
40 ― Donnéz leur l’ordre du cordier.
― Il l’ara, ses compains aussi.
Or tenéz ces deux chaperons :
Estraing. ― Haro ! pour Dieu, mercy !
Vous serréz trop fort les boutons !
45 ― C’est trop tart. ― Nous nous repentons :
De confesser ayons induce.
― Il vous vaulsist mieulx estre en Russe :
Dyables vous firent chevauchier !
Tout homme qui biens d’autrui suce,
50 Donnéz leur l’ordre du cordier.
L’envoy
Princes, chassoires, gresillons,
Fers es jambes pour justicier,
Et pour pugnir mauvais garçons,
Donnéz leur l’ordre du cordier.
[1] Ms. bien
[2] Ms. charretons
[3] Vers manquants
[4] Infraction à la rime
