Chançon royal 97 : Las ! il n’est mais pastour ne pastourelle (DCCCXCIX)
Balade
Las ! il n’est mais pastour ne pastourelle
Ne nul qui puist a droit garder brebis,
Car li mastin ont perdu leur querelle
Par le default d’avoir asséz pain bis,
5 Et les loups vont tout courre le pais,
Qui n’y laissent aignel, brebis, mouton[1],
Vache ne veel, cheval noir, blanc ne gris,
Geline, oe, [ne] poucin ne chapon.
He ! Dieu, que c’est doleureuse nouvelle !
10 Car du bestail estoit chascuns nourris.
De leur laine faisoit telz sa cotelle
Qui sera nuz, povres et esbahis.
Labours faurront, et si a encor pis,
Qu’estranges loups s’assemblent a bandon,
15 Qui ne lairont a nul, ce m’est advis,
Geline, oe, ne poucin ne chapon.
Et j’ay veu vers la saison nouvelle
Que l’en chaçoit telz loups comme ennemis 232d
Par cri royal et commission belle,
20 Dont chascun feu paioit .ii. parisis.
L’en le tuoit et pandoit on aussis.
Lors paissoient surement li chastron.
Autrement va. Plus n’arons, doulz amis,
Geline, oe, ne poucin ne chapon.
25 Telz loups rapaulx valent pis que gabelle :
Frommaige, let, burre et œufs sont peris,
Douce crayme, le matin en foisselle.
Par eulx seront aprés li enfant prins.
Que font levrier et li alant de pris ?
30 Que font veneurs, et pourquoy ne chaç’on ?
S’ilz ne chacent, plus n’aront, je leur dis,
Geline, oe, ne poucin ne chapon.
Noble Lion, le bestail vous appelle,
Et vous devéz secourre voz subgis.
35 Chacéz ces loups, et se nulz s’atropelle
En voz marches, ne souffréz le logis.
Car vous pourriéz par eulx estre honnis
Et acqueillir par leur fait povre nom.
Briefment n’aréz, se conseil n’y est mis,
40 Geline, oe, ne poucin ne chapon.
L’envoy
Princes, qui veult estre bien seignouris,
Et de bestail gras, peuz et nourris,
Le doit garder de loups et de larron
Et gouverner par bel et bon advis,
45 Ou autrement il n’ara, ce m’est vis[2],
Geline, oe, ne poucin ne chapon. 233a
[1] Ms. ne mouton
[2] Ms. iadvis