Chançon royal 96 : L’en treuve es droiz de Champaigne ( DCCCXCVII)
Autre Balade
L’en treuve es droiz de Champaigne, [ce tiens,]
Que la Brie est sa serve et sa chambriere[1].
Car Champaigne est la forme de touz biens,
De blé, de vin, de foing et de litiere.
5 Brie froide est, qui n’a grosse riviere,
Fors boscaiges, nefles sauvaiges, noix.
Pour ce doivent livrer en la fourriere 232a
Ceuls de Brie la mousse aux Champenoys.
Car quant il pluet, es terres ne croist riens.
10 Mais est le blef noiéz en la royere :
De leurs boes font soliers sanz liens.
D’ardoir vert bois ont toudis la maniere.
En leurs hostelz n’a que cendre[2] et humiere.
Leurs vignes sont des prunelles du bois.
15 Pour ce doivent livrer en la fourriere
Ceuls de Brie la mousse aux Champenois.
Et si leur fault, plus qu’autre pais, chiens
Pour les bestes du bois chacier arriere.
Et qui leur dit : ― Dont viens tu ? ― Dont je viens ?
20 Ilz respondent ce que devant derriere.
De leur bestail font garde une bergiere
Qui par les champs queult la mousse a .x. dois :
Pour ce doivent livrer en la fourriere
Ceulx de Brie la mousse aux Champenois.
25 Bailliage n’a en Brie, ce [main]tiens.
Champaigne a Meaulx et Trois, sa justiciere,
Vitri, Chaumont. Par ces .iiii. liens
Ou par les deux est Brie en sa voliere.
A ces grans jours vient toudis la premiere,
30 Car la li fault venir querre ses drois :
Pour ce doivent livrer en la fourriere
Ceuls de Brie la mousse aux Champenois.
Les gens communs sont simples et insciens.
A estrangier ne scevent ne[3] estrangiere
35 Chemin monstrer. N’onques saint Juliens
Pour bon hostel n’ot celle marche chiere.
Brioys n’ont rien qu’a paine et a haschiere,
A Champaigne ont leurs recours mainte fois :
Pour ce doivent livrer en la fourriere
40 Ceuls de Brie la mousse aux Champenois.
L’envoy
Princes, qui veult de froit avoir matiere, 232b
D’yeaue laper, de vert bois la fumiere,
Et de vivre de boutons et de noix,
En Brie voist, car c’en est la maniere.
45 Mais Champaigne li fait a sa priere
Secours souvent [de vin], d’uille et de pois :
Pour ce doivent livrer en la fourriere
Ceuls de Brie la mousse au Champenoys.
[1] Ms. chamberiere
[2] Ms. cendres
[3] Saint Hilaire corrige en n’