Chançon royal 95 : Vous qui priséz et loéz la fleur tant (DCCLXVII)

Autre Balade

                        Vous qui priséz et loéz la fleur tant,
                        Voulons par droit la fueille soustenir.
                        Car au jour d’ui n’est ne petit ne grant,
                        S’il a raison, que ne doye tenir
5                      Que Dieux la fist en tous arbres venir
                        Pour resjoyr dames et damoisiaux
                        Et pour rendre leur chant aux doulx oysiaux.
                        Par sa verdour tuit nous esjoyssons,
                        Sans li ne puet li mondes estre biaux.
10                    Pour ce a fueille plus qu’a fleur nous tenons.

                        Or responde qui vuelt, en arguant :
                        La fleur ne puet fors de la fueille issir,
                        Et se la fleur de la fueille descent,
                        Sa mere est donc la fueille sans mentir.
15                    Naistre la fait, puis croistre et espennir,
                        Et la norrit en ses tresdoulx rainsiaux
                        Virginalment. Fuelle est riches joyaux,
                        Qui ainsi fait la fleur dont nous parlons.
                        Sur toutes fleurs est la fueille royaux :
20                    Pour ce a fueille plus qu’a fleur nous tenons.

                        Et s’il avient qu’il face un po de vent,
                        La fleur verréz et se colour palir,
                        En ordure chiet et va au neant,
                        Fruit et colour li faut perdre et perir.
25                    Maiz la fueille ne puet nul temps morir :
                        Tousjours se tient forte, ferme et loyaulx,
                        Vert en couleur et amoureuse a ciaulx
                        Qu’elle reçoit en l’ombre de ses dons,                                             203b
                        En destruisant les chaleurs desloyaux.
30                    Pour ce a fueille plus qu’a fleur nous tenons.

                        En grans chaleurs voit on prendre souvent
                        Fueilles de saulx pour malades garir.
                        Es cours royaux, en maint riche couvent,
                        Arbres feuillés pour les lieux rafrechir.
35                    En May voit on chascun de vert vestir.
                        On fait dossier es cours des arbrissiaux.
                        Fueilles porte qui veult estre nouviaux.
                        En cuer d’iver fueilles de lierre avons,
                        Maiz fleur n’avéz en arbres n’en vessiaux.
40                    Pour ce a fueille plus qu’a fleur nous tenons.

                        De vostre fruit que la fleur va portant
                        Voit on aucun par droit anientir.
                        Du mengier sont maint et maintes engrant,
                        Maiz petit vault pour le corps maintenir.
45                    Fleur ne se puet a fueille appartenir.
                        Dessoubz li vont cerfs, bisches et chevriaux,
                        Sanglers et dains, connins et laperiaux,
                        Tous les deduis que par le bos querons,
                        Fueille[1] en lorier, de houx, jardins, preaux.
50                    Pour ce a fueille plus qu’a fleur nous tenons.

                        L’envoy

                        Royne sur fleurs en vertu demourant,
                        Galoys, Dannoy, Mornay, Pierre ensement
                        De Tremoille, li borgnes Porquerons,
                        Et d’Autynes Lyonnet vont loant,
55                    Et Thuireval vostre bien qui est grant.
                        Pour ce a fueille plus qu’a fleur nous tenons.

[1] Ms. Feuilles