Chançon royal 94 : Pour ce que j’ay oy parler en France (DCCLXV)

Balade

                        Pour ce que j’ay oy parler en France
                        De deux ordres en l’amoureuse loy,
                        Que dames ont chascune en defferance,
                        L’une fueille et l’autre fleur, j’octroy
5                      Mon corps, mon cuer a la fleur. Et pourquoy ?
                        Pour ce qu’en tout a pris[1], loange et grace
                        Plus que fueille qui en pourre trespasse
                        Et n’a au mieux fors que verde coulour,
                        Et la fleur a beauté qui trestout passe.
10                    A droit jugier je me tien a la flour.

                        Celle doit on avoir en reverance,
                        Sy l’y aray. Qu’en toutes choses voy
                        Loer la flour en bonté, en vaillance,
                        En tous deduis, en manniere, en arroy.
15                    S’on scet rien bon, c’est la flour pour un roy.
                        En tous estats vient la fleur a plaisance :
                        De tout dit on, et par grant exellance,
                        Que cilz ou celle a la fleur sans retour
                        De quoy que soit, tele est l’acoustumance :
20                    A droit jugier je me tien a la flour.

                        Amour la sieut, doulz desir, esperance,
                        Beauté, bonté, et de tous loer l’oy.
                        Coulour, odour et fruit de souffisance
                        Viennent de ly. Maiz mie n’aperçoy
25                    Que la fueille ait nulle vertu en soy,
                        Ne que douçour, fruit, ne grant plaisir face.
                        Maiz maintes foys apalit et efface,                                                   202d
                        Ne rien ne voy en li de grant vigour
                        Fors de couvrir la fleur dessus sa place :
30                    A droit jugier je me tien a la flour.

                        Celle humble flour aray en remenbrance
                        Qui tant noble est, humble et de maintien coy,
                        Que[2] n’est tresor, pierre, avoir ne finance,
                        Qui comparer peust a li par ma foy.
35                    Son ordre prain et humblement reçoy,
                        Qui plus digne est d’esmeraude ou topace :
                        Guillaume fay, La Tremouille, or li place
                        Que du porter me face tant d’onour.
                        Car ordre n’est qui plus mon cuer solace.
40                    A droit jugier je me tien a la flour.

                        Et qui vouldra avoir la congnoissance
                        Du tresdoulx nom que par oir congnoy
                        Et du pais ou est sa demourance
                        Voist en l’ille d’Albyon en recoy,
45                    En Lancastre le trouvera, ce croy.
                        P.H. et E.L.I.P.[P.]E. trace,
                        Assemble tout. ces .viii. lettres compasse,
                        S’aras le nom de la fleur de valour,
                        Qui a gent corps, beaux yeux et douce face.
50                    Au droit jugier je me tien a la flour.

                        L’envoy

                        Royne d’amours, de douce contenance,
                        Qui tout passéz en senz et en honnour,
                        Plus qu’a fueille vous faiz obeissance :
                        A droit jugier je me tien a la flour.

[1] Ms ; prins

[2] Ms. Qui