Chançon royal 92 : Selon la loy naturele et divine (CCCCVII)
Autre Balade
Selon la loy naturele et divine,
Il est un Dieu et sanz commencement,
Qui tous temps fut, et[1] sera et ne fine,
Et qui jamais n’ara fenissement.
5 Qui tout crea : ciel, terre, eaue ensement,
Le feu aussi, beste, oiseaulx[2], creature :
Et qui tendra de tout le jugement,
Car a chascun doit rendre sa droiture.
Cilz Dieux puissans aux cuers piteus s’encline,
10 Qui de sa loy font le commandement.
L’orgueilleus het, il ayme le benigne.
L’un exauce, l’autre met a tourment.
En sa main est, se Verité ne ment, 140b
La victoire, selon saincte escripture,
15 De ceuls qui font guerre mondainement,
Car a chascun doit rendre sa droiture.
Ceste raison se preuve et determine[3],
Tant du nouvel com[4] du viel Testament,
Par Josué, par Judith la tresdigne,
20 Qui prierent Dieu tresdevotement,
Leur peuple aussi, pour oster le tourment
Des ennemis et la guerre tresdure
Qui leur sourdoit. Dieu vit leur sentement,
Car a chascun doit rendre sa droiture.
25 Et quant il sceut l’umilité benigne
De son peuple vivant devotement,
Par Judith fist Oloferne l’indigne
Copper le chief de nuit honteusement,
En Bethulie la porta saigement.
30 Quant l’ost le sceut, si fuit a desmesure.
Dieu les venga, qui juge justement,
Car a chascun doit rendre sa droiture.
A Josué fist il, en brief termine,
.xxii. roys destruire, et vrayement
35 Le souleil fist retourner en sa lingne
Par .x. degréz pour leur destruisement.
Qui aime Dieu, il vaint communement
Ses ennemis. Mais des mauvais n’a cure,
Ains les confont et vaint en un moment,
40 Car a chascun doit rendre sa droiture.
L’envoy
Prince, qui veult combatre aucune gent
Doit amer Dieu, de pechié ne s’obscure.
Qu’il ait bon droit et soit Dieu deprient,
Car a chascun doit rendre sa droiture.
[1] Saint Hilaire corrige en est
[2] Saint Hilaire corrige en oiseau
[3] Ms. se determine
[4] Ms. comme
