Chançon royal 91 : Se Romme qui le monde subjuga (CCCCVI)
Autre Balade
Se Romme qui le monde subjuga
Par .vi. moyens, et tint la monarchie :
Par liberté dont banniere leva,
Par unité au bien commun unie,
5 Par justice, par vertu, par clergie
Et par honneur, si que sanz fiction
Pugnit les maulx, et retribucion
Donna aux bons, non triumphe et victoire,
Regna long temps en grace et en memoire,
10 Merveille n’est. Mais puis fut a province
Ramenee par orgueil et vaine gloire :
Avisent ci empereur, roy et prince.
Par franchise que chascuns desira
Et unité acrut sa seignourie. 139d
15 Le bien commun que chascun d’elle ama
Plus que le sien, vertu, chevalerie,
Le sens des vieulx, honeur, phillosophie,
Justice et loy fist Romme en union,
En seignourie, en dominacion,
20 Vivre et regner, selon la vraie histoire.
Tant com ces poins vouldrent garder et croire
Rommains, n’est homs qui les morde ne pince.
Or sont destruit par mauvais acessoire :
Advisent cy empereur, roy et prince.
25 Car quant guerre punique leur cessa,
Le grant repos leur tourna a folie.
Orgueil, envie, haine les bleça,
Plaiz et procés et leur hault lignie.
L’estude lors fut par eulx envahie,
30 Qui s’en ala en leur destruction.
Katherine[1] fist la conjuroison
Dont maint Rommain mourut, c’est chose voire.
Particuliers pour leur fait possessoire
Furent adonc : l’un mort, l’autre repince,
35 Tant que leur fin est au jour d’uy notoire.
Avisent ci empereur, roy et prince.
Justice, honeur, vertu dissimula.
Le bien commun n’ot ami ne amie,
Car foul plaisir le chetif esleva,
40 Le cuer vaillant et le prodomme oublie.
Par traison fut la cité honnie
Et destruite mainte noble maison.
Les provinces pour tel division
Et leurs subgiéz furent contraditoire,
45 En revelant contre leur auditoire
Si firent frans. Foulz est qui telz cholz mince
Dont les Roumains[2] ont perdu leur pretoire :
Avisent cy empereur, roy et prince.
S’un petit lieu, que Romme conquesta,
50 Qui n’est ou point du cadrant c’une mie 140a
En son regart, perit par ces poins la,
Bien doi doubter royaume qui varie,
Qui ne craimt Dieu, qui ne suit bonne vie.
Qui voit les poins dont j’ay fait mencion
55 Croistre et regner en sa perdicion
Sur son pais pas ne devroit mescroire
D’avoir autel en cas plus illusoire
Comme Romme ot. Mais foulz ne doubte ou crince
Jusqu’il pert tout par trop estre inmemoire :
60 Avisent ci empereur, roy et prince.
L’envoy
Contes et ducs et cité[s], qui ara
Gouvernement, tiengnent bien a la pince
Les .vi. bons poins desquelz Romme regna.
Et quant ainsis par les laissier fina,
65 Avisent cy empereur, roy et prince.
[1] Saint Hilaire corrige en Katelina
[2] Saint Hilaire corrige en Rommains
