Chançon royal 90 : Il ot jadis, selon la fiction (CCCCV)
Autre Balade
[fable politique]
Il ot jadis, selon la fiction,
Guerre mortel, perilleuse et doubtable,
Qui trop dura et fist d’afliction,
Entre Bernart, l’arceprestre invocable,
5 Et Briquemer, le cerf non deffensable,
Qui gasterent l’un de l’autre pais.
Pastures, bois, faons sont envahis.
Les feux boutéz, pluseurs mors en bataille. 139b
Tant que chascun d’eulx en fut esbahis.
10 Treves ont prins entr’eulx, vaille que vaille.
Lors Briquemer, josnes d’entencion,
Non regardans la fortune versable,
Puissans de corps, court par sa region
Et en maint parc fait chose decourable,
15 Bestes saillir, hurter, courre, et muable
Le cours du temps. Par jour sont endormis,
Et par nuit sont aux gieux et dances mis.
A nonne sont couchans sur leur couraille :
Leurs corps gastent, jambes, cornes et pis.
20 Treves ont prins entr’eulx, vaille que vaille.
Mais de la paix n’est nulle mention,
Et si s’en vont maint cerf la mer nouable,
Hors des palus de la subjection
De Briquemer, qui est chose doubtable,
25 Sanz li pourvir. Et l’asne est en s’estable
Qui espargne buefs, vaches et brebis,
Ses pastures, aliéz et subgis,
En deffendant que nulz hors d’iceulx n’aille :
Malice y quiert l’un d’iceuls ennemis.
30 Treves ont prins entr’eulx, vailleque vaille.
Or s’assemblent pour la conclusion
De celle paix loups, renars entendable :
Tybers li chas, pour la possession
De damp Bernart. pour Briquemer parlable
35 Sont les chevriaulx, ours[1] et levriers courable.
<Qui par coliers sont tuit d’or reluisable>[2]
Mais en traictant ne puelent estre amis.
Tybers li chas, qui aguette toudis,
Sent que le cerf n’a c’un po grain et paille,
40 Les treves ront et prant une souris.
Treves ont prins entr’eulx, vaille que vaille.
Mais ces treves sont en decepcion 139c
Pour Briquemer : ains le terme finable
Loups et sangliers et l’asne en union
45 En ses forests font dam inreparable.
Car despoirveu l’ont sousprins a sa table
Et ont gasté pastures et herbis.
Qui treves a soit tousjours ententis
De soy garnir et pour faire bataille,
50 Car de ces deux estoit li communs dis :
Treves ont prins entr’eulx, vaille que vaille.
L’envoy
Prince[3], aviséz que ne soiéz laidis :
En oyseuse, en gieux ne en delis,
Se paix n’avéz, d’entendre ne vous chaille.
55 Treves ne sont fors la mort des chetis.
Garnisséz vous, cilz mos soit entredis :
Treves ont prins entr’eulx, vaille que vaille.
[1] Ms. les ours
[2] Vers surnuméraire
[3] Ms. Princes
