Chançon royal 89 : Ovides, qui bien figura (CCCCIV)
Balade
Ovides, qui bien figura 138d
Des bestes la proprieté,
Et par fiction [en] parla
Ramenans a moralité
5 L’orgueil, l’ordure et vanité
Des meurs aux hommes bestiaulx,
Qui faint les dieux celestiaulx,
Ne fut si saiges que ceuls sont
Qui en bestes et en oiseaulx
10 Leur propre nature deffont.
Car maint, qui bien garde y prandra,
Sont singe, tant son escourté,
Et tant de taiches sur eulx a,
Comme panthere loqueté
15 Sont, et de pluseurs draps brodé.
De leurs manches font chalemiaux
Et se souillent comme pourceaux
Es laides ordures du mont.
Helas ! que ne s’avisent ceaulx ?
20 Leur propre nature deffont.
Adam ne Noé ne chaussa,
Ne noz peres d’antiquité
Telz solers comme on trouvera
Qui une aulne ont de bec anté,
25 De denz de balaine enhanté.
S’en reculent com creviciaulx,
Leur cul monstrent et leurs museaulx
Cueuvrent, qui a descouvrir font.
Et par ainsis ces gens nouveaulx
30 Leur propre nature deffont.
Au chien ou envie s’en va
Puelent bien estre comparé,
Au lion qu’orgueil surmonta,
Dont maint d’iceulx sont surmonté.
35 Apparant estre hault monté,
Veulent bien cuider estre beaux 139a
Par dehors, mais dedenz en eaulx
Bonnes vertus ne s’apparront.
Grans queues portent comme veaulx :
40 Leur propre nature deffont.
Chascuns d’eulx par nuit veillera.
Aux suettes sont comparé,
Car par jour l’en les trouvera
En lit jusqu’a midi sonné.
45 A touz gieux sont habandonné
Et a vivre de gloz morseaulx,
A convoitier l’or a monceaulx
Et moquer ceuls qui bien feront.
Mais a faire ainsi leurs reveaulx
50 Leur propre nature deffont.
L’envoy
Princes, ce qu’ay[1] ci recité
Seroit bien de neccessité
De laissier a val et a mont.
Car ceuls qui font tel niceté
55 Ont plus bestes que homme esté.
Leur propre nature deffont
[1] Ms. que j’ay
