Chançon royal 87: Je vi jadis que j’oy un grant vivier (CCCCII)
Balade
Je vi jadis que j’oy un grant vivier
Empres lequel avoit une foursiere
Qui me faisoit mon estanc poissonnier
Et le peuploit en temps [de] ça arriere
5 De grant poisson et par bonne maniere,
Car trois meres en cel fourcier avoit
Qui de peuple[r] mon estanc gouvernoit
Par leur moien, qui maint bien m’ont rendu.
Mais ce fourcier est devenu trop froit,
10 Dont mon estanc est de tous poins perdu.
Plus n’y puelent carpes fructifier,
Car entour a trop de male bruiere,
Loutres aussi qui ne font que peschier,
Et les herons vont devant et derriere.
15 Les cosmarans, nul n’est d’eulx qui ne quiere
Poissons pour lui, et pas ne s’en perçoit
Le grant poisson qui en l’estanc se joit,
Qui des oiseaulx s’est asséz deffendu.
Mais le meschief pas encore ne voit,
20 Dont mon estanc est de tous poins perdu.
Car il vivoit de ce peuple au premier
Dont la pesson devoit avoir treschiere, 138a
Tant qu’il y ot garde et bon garennier
Qui deffendoit es oiseaulx la riviere.
25 Loutre n’y vint, ne avant ne arriere.
Car le loutrier a ses chiens les chaçoit,
Et le peuple laiens se nourrissoit,
Qui de present est mort et confondu.
Ce sont les poins, fouls est qui ne le croit,
30 Dont mon estanc est de tous poins perdu.
Or convendra ces luz amaigroier,
Car plus n’aront pasture qui affiere,
Et le plus fort le plus foible mangier.
Hairons feront adonc dolente chiere :
35 Le pueple mort, les fauldra mettre en biere,
La loutre aprés mourra de faim par droit.
Les cosmarans seront a grant destroit,
Et tout sera par leur coulpe advenu.
Chascuns saiges asséz par ce congnoit,
40 Dont mon estang est de tous poins perdu.
Alegorie
Les .iii. meres pour peuple[1] edifier,
Qui mortes sont, est Franchise premiere.
Raison aussi pour tout fructifier,
Et Justice est auques la derreniere.
45 Et la fourse est du peuple la matiere,
Que l’en destruit par les tenir trop roit.
Li grans poissons, li princes se deçoit,
Li noble oisel en seront malostru.
Regne et vivier monstrent par cest esploit
50 Dont mon estanc est de tous poins perdu.
L’envoy
Princes, pour Dieu, qui si s’adviseroit,
Ce bon foursier et peuple resourdroit,
Et les meres qu’avéz ci entendu,
Et cel estanc, ce regne en peupleroit
55 Et les oiseauls et bestes chaceroit 138b
Dont mon estanc est de tous poins perdu.
[1] le peuple
