Chançon royal 86 : Pour ce que nulz, s’il n’estoit liberal (CCCCI)
Autre Balade
Pour ce que nulz, s’il n’estoit liberal,
N’osoit aprandre les .vii. ars liberaulx
Le temps passé, tuit li prince royal
Et tous nobles[1], quant leur sang estoit chaux,
5 Aprenoient les vertuz cardinaulx,
Hebrieu et grec, latin phillosophie,
En jeune temps. Et puis chevalerie
A leur vint ans, quant fors furent et vers,
Leur donnoit on. Ainsi ne fait l’en mie.
10 Car chevaliers ont honte d’estre clers.
Mais ce n’ot pas David, le roy loyal,
Ne Salemon, Alixandres ne Claux,
Julles Cesar, au ceptre imperial,
Tholomeus, pluseurs nobles vassaulx,
15 Charles li grans, qui tant firent d’assaulx
Et conquirent du mont la monarchie
Par leur traveil, par sens et par clergie,
Dont ilz furent es armes plus expers.
Autrement va : Noblesce en ploure et crie.
20 Car chevaliers ont honte d’estre clercs.
Foibles, josnes les montent a cheval,
Dont aux membres aviennent pluseurs maulx,
Puis fourmandent et a mon et a val,
En destruisant leurs forces principaulx,
25 Deliz de char, faire faiz de ribaux,
Leur aprant on et deshonneste vie,
Jouer aux dez, orgueil et glotonnie.
Et la science ont aprinse les sers,
Qui ont depuis acquis leur seignourie.
30 Car chevaliers ont honte d’estre clers.
Mais depuis ce qu’ilz ont, en general,
Eu en despit ces ars especiaulx,
Science en eulx, tuit li occidental
Ont moult perdu de terre et de feaulx
35 Que princes clers conquierent par travaulx.
Et leurs enfans l’ont perdu par folie.
Si lo qu’a sens chascun d’eulx se ralie,
Et le commun soit a ouvrer appers
Les ars mondains, ou noblesse varie.
40 Car chevaliers ont honte d’estre clers.
Clergie fut en l’age juvenal
Des nobles gens et des princes royaulx,
Chevalerie. Et en un corps egal
Ces deux suir vit l’en toudis entre aulx.
45 Telz ars sçavoir n’osoit lors nul de ceaulx
Qui ne fust nez de liberal lignie. 137d
Ceuls ouvroient de leur charpenterie,
Et d’autres ars es champs et en desers,
Qui a present ont la meilleur partie,
50 Car chevaliers ont honte d’estre clers.
L’envoy
Prince, pour Dieu, humblement vous supplie
Que gentillesce a science estudie
Comme autrefoiz. Ne lui soit nulz divers,
Et les vertuz revendront en partie.
55 Si non je voy noblesce deperie.
Car chevaliers ont honte d’estre clers.
[1] Ms. les nobles
