Chançon royal 85: Je suis certain de la mutacion (CCCC)
Balade
Je suis certain de la mutacion 137a
Des royaumes et de la seigneurie
En pluseurs lieux, par la descripcion
De Jhesucrist, Salemon, Jheremie.
5 Par nostre loy qui d’amer nous escrie
De cuer, d’ame, Dieu, son proesme com soy.
En ces .ii. poins pent toute nostre loy,
Li .xii. articles, les dix commandemens.
Mais au rebours un chascun faire voy,
10 Pour ce du mont bien li fenissemens.
Le bien commun va a perdicion.
La loy deffault et l’estude est perie.
Les biens de Dieu sont en vendicion.
Les meurs muent de la chevalerie.
15 L’or se depart, tout estat se varie.
Justice fault, humilité et foy.
Convers, baras, regnent en court de roy.
Particuliers sont partout toutes gens.
Religieus, seculiers apperçoy :
20 Pour ce du mont vient li fenissemens.
Je voy Orgueil et toute elacion
En povreté, avarice qui crie
Pour tout ravir, c’est la destruction
Qu’orent Rommains, c’est la cause en partie
25 Qui fait muer royaume et monarchie,
De gent en gent, par pechié et desroy,
Et fait gaster finance poy a poy,
Les gens pugnir qui sont perseverens
En leur pechiéz, dont bien conclure doy :
30 Pour ce du mont vient li fenissemens.
Par ces poins vint la transmigracion
De la cité ou Dieu prist mort et vie.
Jherusalem perdit sa region,
Babiloine subjuga leur folie.
35 Par leur pechiéz le regne d’Assirie
Leur fut ostéz. Alixandre, ce croy, 137b
Par son orgueil Daire mist a supploy,
Perse conquist. C’est de Dieu jugemens,
Quant nul ne craint lui, et n’a bon arroy :
40 Pour ce du mont vient li fenissemens.
Approuchier voy la grant pugnicion
Soudainement d’un chascun qui folie.
Venir leur voy une inclinacion,
Sanz cause avoir, qui a la mort les lie.
45 Ne raison n’est qui sur ce soit[1] oye.
Fortune veult chascun mettre en ce ploy
Et les mauvais paier d’autel aloy,
Car, puisque nul n’est sur ce repentens,
Tout perira, et ce pas ne mescroy :
50 Pour ce du mont vient li fenissemens.
L’envoy
Prince, je voy perseveracion
De mal en mal et sanz correpcion,
De jour en jour, des petiz aux plus grans,
Sanz repentir ne bonne intencion,
55 Dont je conclus ceste conclusion :
Pour ce du mont vient li fenissemens.
[1] Ms. puist estre
