Chançon royal 84 : Force de corps, qu’est devenu Sanson (CCCXCIX)

Balade

                        Force de corps, qu’est devenu Sanson ?
                        Ou est Auglas, le bon praticien ?
                        Ou est le corps du sage[1] Salemon ?
                        Ne d’Ypocras, le bon phisicien ?
5                      Ou est Platon, le grant naturien ?
                        Ne Orpheus a[2] sa doulce musique ?
                        Tholomeus o son arismetique ?
                        Ne Dedalus qui fist le bel ouvrage ?
                        Ilz sont tous mors, si fu leur mort inique.
10                    Tuit y pourront, et li fol et li saige.

                        Qu’est devenus Denys, le roy felon ?
                        Alixandre, Salhadin, roy paien,
                        Albumasar ? Mort sont, fors que leur nom.
                        Mathussalé, qui tant fu ancien,
15                    Virgille aussi, grant astronomien,
                        Julles Cesart et sa guerre punique,
                        Auffricanus Scipio, qui Auffrique
                        Pour les Rommains conquist par son bernage
                        Redigéz sont ceulx en cendre publique.
20                    Tuit y mourront, et li fol et li saige.

                        Ou est Artus, Godeffroy de Buillon,
                        Judith, Hester, Penelope, Arrien,
                        Semiramis, le poissant roy Charlon,
                        George, Denys, Christofle, Julie,                                                         136d
25                    Pierres et Pols, maint autre crestien,
                        Et les martirs ? La mort a tous s’applique.
                        Nulz advocas pour quelconque replique
                        Ne scet plaidier sanz passer ce passage,
                        Ne chevalier tant ait ermine frique.
30                    Tuit y mourront, et li fol et li saige.

                        Puisqu’ainsi est, et que n’y avison,
                        Laisse chascun le mal, face le bien.
                        A ces princes cy dessus nous miron
                        Et aux autres qui n’emporterent rien
35                    A leurs trespas fors leurs biens fais, retien,
                        Pour l’ame d’eulz. Leur renom auttentique
                        N’est qu’a leurs roys[3] d’exemple une partie,
                        D’eulz ressembler en sens, en vasselage.
                        Ce monde est vain, decourant, erratique.
40                    Tuit y mourront, et li fol et li sage.

                        Mais j’en voy pou qui en deviengne bon
                        Et qui n’ait chier l’autrui avec le sien.
                        De convoitise ont banniere et panon
                        Maint gouverneur de peuple terrien.
45                    Las ! homs mortelz, de tel vice te abstien,
                        En gouvernant par le droit polletique.
                        Ce que Dieu dit regarde en Levitique,
                        Si ne feras jamais pechié n’oultrage.
                        Preste est la mort pour toy bailler la brique.
50                    Tuit y mourront, et li fol et li saige.

                        L’envoy

                        Princes mondains, citéz, terre, donjon,
                        Biauté de corps, force, sens, riche don,
                        Joliveté, ne vostre hault parage,
                        Ne vous vauldront que mort de son baston
55                    Ne vous fiere soit a bas ou hault ton.
                        Tuit y mourront, et li fol et li saige.

[1] du sens de

[2] Saint Hilaire corrige en o

[3] Saint Hilaire corrige en hoirs