Chançon royal 83 : Bouche, les piéz fort de toy nous plaignons (CCCXCVIII)

Balade

                        Bouche, les piéz fort de toy nous plaignons,
                        Qui par excés nous donnes trop de paine.
                        Pour assouvir ton ventre ne cessons
                        De traveillier : sera ta panse plaine
5                      Jamais nul jour ? de vivre te souviengne
                        Selon raison, tant de mes ne demande.
                        Nous en paions plus que nul chiere amende,
                        De tout ton corps avons l’agrevement.
                        Mourir nous fais, se ton cuer ne s’amende,
10                    Par le deffault de vivre sobrement[1].

                        Autres bouches en pluseurs lieux savons
                        Dont la vie est par sobrieté saine,
                        Et leurs membres, fors, vigeureux, voions
                        Vivre long temps et qui ont gant alainne.
15                    Nature ceulz jusqu’a leur aage maine                                               136b
                        Sanz piéz grever. Mais ton aage s’avance,
                        Car riens ne vault fors emplire ta panse,
                        Dont tes membres sont grevé durement
                        Et pres de mort, que gloutonnie avance
20                    Par le deffault de vivre sobrement.

                        Mains, aviséz les griefz que nous souffrons.
                        De noz douleurs estes cause certaine :
                        A la bouche bailléz aulx et ongnons,
                        Viandes et vins trop plus qu’il ne conviengne.
25                    Le ventre fault chascun de nous soustiengne.
                        Son chief pesant trop nous fait de grevance.
                        Restraignéz la, bailléz lui abstinence,
                        Ou ventre et vous mourrés soudainement,
                        Et nous aussi, en tel perseverence,
30                    Par le deffault de vivre sobrement.

                        Les piéz dient aux mains : ―Et que ferons ?
                        Car la bouche trop malement nous maine :
                        Tousjours requiert. Se sont vouloir faisons
                        Mourir nous fault. S’il est c’om la refraigne
35                    Elle sera plus felle qu’une yraigne.
                        Le ventre et lui aront grant desplaisance
                        Se refrains sont : par leur fole cuidance
                        Ne mengeront, s’ilz n’en ont largement.
                        Lors mourront tuit voire d’une sentence
40                    Par le deffault de vivre sobrement.

                        La bouche a dit : Creéz vous piéz et talons ?
                        Pereceux sont, d’eulz est chose villaine.
                        Laissiéz ester, bien servir les ferons.
                        Les mains dient : Vous estes souveraine,
45                    Mais vous n’aréz a mengier de[2] sepmaine
                        Qu’ainsi qu’il fault pour vostre soustenance,
                        Sanz Sanz exceder et par droite ordenance,
                        Car tuit mourrons par vo gourmandement.
                        Pas ne voulons ensuir ceste dance
50                    Par le deffault de vivre sobrement.                                                   136c

                        L’envoy

                        Prince, vray est, et n’en faites doubtance
                        Que piéz et mains par la desordenance
                        De la bouche meurent communement.
                        Pour ce fait bon mengier par attrempance,
55                    Sanz exceder ne mourir en s’enfance
                        Par le deffault de vivre sobrement.

[1] Ms. soblement

[2] Ms ; des