Chançon royal 79 : Seure chose est a prince de savoir (CCCXCIII)
Autre Balade[1]
Seure chose est a prince de savoir
De son pais la marche et les destrois,
Ceulx qui l’ayment et de corps et d’avoir,
Pour congnoistre qui est li plus adroiz 134a
5 De ses pays et plus noble frontiere,
Ou il a genz plus noble et plus entiere,
En tout honneur et bon gouvernement.
Pour lui servir plus honnorablement,
En tous estas et par bonne maniere.
10 Le roy le puet asséz apparcevoir
Par son puissant pays de Vermendois.
Car a Coucy[2] en a fait son devoir
Le bon seigneur, et ailleurs pluseurs fois.
Ne nulz ne vit plus belle heronniere
15 Qu’a Saint Aubin, ne d’oiseaux de riviere
Venir deduis ne plus gracieusement.
Vers Foulambray ot maint faucon volant,
Et maint heron pris dessus la praiere.
Et avec ce, qui veult dire le voir,
20 A Saint Gombain fu bien aise li roys
De vir le lieu. La pot bien percevoir
Que le pays est planteureux de bois.
La lui firent les dames bonne chiere.
Et l’andemain vit devant sa litiere
25 Biches et cerfs prendre joyeusement :
En pays nul n’a tel esbatement,
Ne nulz chasteaulx de plus forte matiere.
A Novion pot plaisant lieu veoir,
Et au souleil cler resplendir les toys,
30 Et le prince richement recevoir :
Qui fu illec trouver pot le hault doys.
De tous poissons ot illec cours pleiniere.
Le gentil roy y vint a la priere
Jehan Le Mercier, qui le vit grandement :
35 La ot bons vins et moult bel parement
En son chastel fait de [tres]bonne piere.
A Saint Lambert vint veoir le manoir,
Emmy l’estang, li doulx prince courtoys,
La lui fist on grans poissons apparoir. 134b
40 Cerfs et biches y vindrent a son choys
De la forest. Puis se retrait arriere,
Au chastel noble et place de[3] Costiere.
Par Le Fere fist son departement,
Acompaigné toudis de noble gent.
45 Qui veult deduit, en ces marches le quiere.
L’envoy
Prince, je tien que du pays françoiz,
Pour tout deduit et tout esbatement,
Pour genz d’onneur et de gouvernement,
N’est tel pays comme le Vermendois.
[1] Chant royal sans refrain
[2] Ms. Coircy
[3] Ms. a