Chançon royal 77 : Qui faire veult aucun fort edifice (CCCXCI)
Autre Balade
Qui faire veult aucun fort edifice,
Neuf choses fault a son ediffier :
Pierre, sablon, terre, chaux pour l’office,
Yaue, merrien, saison, chevance, ouvrier.
5 Et si prengne bien garde au commencier
Qu’il ne faille a son propos,
Car, en ce cas, seroit tenus pour fols.
Et pour ce un ver dit le saige en latin
Qui se conclud en disant par telz mos :
10 Fay sagement et regarde la fin.
Qui commence sanz parfaire est un vice
Qui fait d’omme le sens repudier.
Honte le suit, on le tient pour un nice.
Pour ce doit bien un chascun obvier
15 A ce peril et lui vien conseillier.
De loing doit veoir ses cops
A ce que nul ne lui tourne le dos.
A voulenté ne doit nul estre enclin
Contre raison. Pour ce te dy et los :
20 Fay saigement et regarde la fin.
Aussi se doit bien garder d’avarice
Prince qui veult autrui gent guerroier. 133b
Veon comment son propos acomplisse,
Et lui convient .ix. piéz estudier :
25 Vivres lui fault, argent pour s’aidier,
Gens qui ne soient pas mols,
Larges en dons, de mensonges forclos,
Perseverer tousjours et sanz hutin.
Soiéz humains, n’ayéz ja hostel clos.
30 Fay saigement et regarde la fin.
S’aucun fait mal, garde c’om le punisse.
Tu dois ton corps en honneur traveillier,
Estre attrempéz, que chascun t’obeisse,
Venerables, et ton bien ralier,
35 […][1]
Ne perseverer en repos.
Soiéz vers Dieu, a ses povres devos,
Et a pité a ton dessus enclin.
Ayme les bons et escheve les fols,
40 Fay saigement et regarde la fin.
S’autrement fais, tu trouverras eclipce
Qui te fera ton œuvre tresbuschier,
Car fondement qui est fondé sur clipce
Ne puet souffrir ne pierre ne mortier,
45 Qu’il ne conviengne cheoir et despecier.
Mais, se le principe est gros
Et bien fondé de charbon et d’estos,
L’ouvrage est lors seur et enterin.
Pour ce conclus en ce que je propos :
50 Fay saigement et regarde la fin.
L’envoy
Prince[s], cilz doit son fait bien adrescier
Qui entreprent d’armes aucun mestier
Ou ouvrage qui ne voit a declin,
Car il a p[r]ou a faire au commencier. 133c
55 Pour ce conclus et dy pour avisier :
Fay saigement et regarde la fin.
[1] Vers non édité ou vers manquant non signalé