Chançon royal 76 : O Justice, de trop foible merrien (CCCXC)
Autre Balade
O Justice, de trop foible merrien
Est au jour d’uy, de ton Dieu te souviengne,
Car tu ne fais en ce monde mais rien,
Ne nul n’y sçay qui t’aint ne qui te craingne.
5 Mauvais ne voy qui contre droit n’enprengne.
Le plus puissant ravist, murdrist et tue.
Sanz pugnir nul est destruite t’enseigne. 132d
Helas ! Justice, et qu’es tu devenue ?
Pour ce te puis comparer asséz bien
10 A la toile et au fil de l’yraigne :
Les mouchetes prent la par son engien
Et les destruit. Mais, s’il est qu’il aviengne
Que mouche gros parmi la toile prengne,
La derompt tout, l’yraigne est reponnue.
15 Ja ne doubtéz qu’a fort mouche se prengne.
Helas ! Justice, et qu’es tu devenue ?
Ainsi est il, chetive, or le retien,
Car la toile les povres genz mehangne
Pour petit cas. Mais li desloyal chien,
20 Dont l’un ravit, l’autre tue ou meshangne,
Passent parmi, et n’est qui les retiengne,
Car tu t’en fuis toudis a leur venue.
Tes noms fauldra, se Dieu ne le ramaigne.
Helas ! Justice, et qu’es tu devenue ?
25 Firent ainsi nostre pere ancien ?
N’est ce pas drois que raison te reprengne
Et Dieux aussi d’ainsi perdre le sien,
Quant tu ne fais ce que la loy enseigne ?
Par ton deffault vient, c’est chose certaine,
30 Que destruite est toute la gent menue,
Car au puissans ne fais torment ne paine.
Helas ! Justice, et qu’es tu devenue ?
Tout deust estre lié par ton lien,
Car de pugnir es dame souveraine,
35 Et lors feussent en paix li terrien.
Or es cause de la douleur mondaine,
Avise toy, pour tes pechéz te seigne.
Fais que soies justiciere tenue,
Que la fureur de Dieu ne te surpraigne.
40 Helas ! Justice, et qu’es tu devenue ?
L’envoy 133a
Prince, aprés Dieu n’est plus souverain bien
Que de justice et amer son prochien,
Mais qu’elle feust droitement maintenue.
Pour ce doivent crier li crestien,
45 Li Grec aussi, li juif et li paien :
Helas ! Justice, et qu’es tu devenue ?
