Chançon royal 75 : Le lyon noir, orguilleux et felon (CCCLXXXIX)
Autre Balade
Le lyon noir, orguilleux et felon,
Qui son bestail vouloit tout devorer,
Sanz espargner buef, vache ne mouton,
Brebis, aignel, cerf, biche ne senglier,
5 Qu’il ne feist destruire et estranglier,
Lui ont requis loy, coustume et usaige,
Qu’il a voulu de tous poins refuser.
Pour ce chacié l’ont hors de son boscage.
Il avoit d’eulz son escript a son bon,
10 Oultre vouloit leur cuir rere et peller.
Les leups avoit attrais a son panon,
Pour le surplus a sa force appliquer.
Mais par un parc a voulu repliquer
Le best[i]ail, qui en son maistre estage
15 A le lyon fait quatir et mucer :
Pour ce chacié l’ont hors de son boscage.
A bataille ont porté leur gonfanon,
Le lyon fait en son recept bouter,
Entré dedens o lui (voulsist ou nom),
20 Prins et pillié, et fait les leups torper,
Querir par tout pour son corps attraper.
Mais la brebis le sauva du village.
Par son orgueil l’en a falu aler :
Pour ce chacié l’on hors de son boscage.
25 Entre eulx ont fait un seigneur d’un gagnon,
Qui fait les pars et les palus garder : 132c
Et sont plus suer[1] que le jus d’un ongnon.
A ce doit bien orguilleux regarder.
Dieux abesse les grans sanz retarder,
30 Et les petis haulse en humble courage.
On le puet bien par ce lyon prouver :
Pour ce chacié l’ont hors de son boscage.
Orgueil fist jadis[2] perir Absalon,
Et Lucifer de paradis getter,
35 Saul mourir, decapiter Noiron,
Alixandre le roy empoisonner.
Estre humble doit, qui veult sire regner[3],
Prendre son droit, sanz faire aux siens oultrage.
Autrement a le Noyr voulu ouvrer :
40 Pour ce chachié l’ont hors de son boscage.
L’envoy
Prince, beste royal est le lyon,
Dont il est pou. Doit avoir vision
De seigneurir son bestail, s’il est saige[4],
Moiennement, sanz trop d’exaccion.
45 Autrement fist. C’est sa perdicion :
Pour ce chacié l’ont hors de son boscage.
[1] Ms. pluseurs
[2] Saint Hilaire corrige en jadis fist
[3] Ms. emprisonner
[4] Saint Hilaire corrige en saige
