Chançon royal 74 : En mon dormant fu n’a gaires ravis (CCCLXXXVIII)
Balade
En mon dormant fu n’a gaires ravis
En un regne gracieux, bel et tendre,
Ou il avoit tresgracieux pays :
Or me sembloit que devenoit le mendre.
5 En chevauchant en un pré vy descendre
Une dame qui se nommoit Nature,
Qui laidangoit fort une creature
Qui corps avoit bel et grant. Lors dit : ― Suer,
Je ne puis rien, c’est ma desconfiture.
10 J’ay terre et corps, mais je n’ay point de cuer.
Adonc lui dit : ― Tresmaleureux chetifs,
Je t’ay bien fait et fourmé chascun membre,
Piéz, jambes, mains, ventre, cuisses et pis,
Bras et genouls, col et chief. Or te membre
15 Que tu as sens pour congnoistre et apprendre
Bien et honneur, mais du faire n’as cure.
Souefz delis et mole nourreture
Te getteront de ton royaume fuer.
M’entens tu bien ? Lors respont par ardure :
20 ― J’ay terre et corps, mais je n’ay point de cuer. 132a
Pourquoy es tu lasches et desconfis ?
Grans et gros yers pour ta terre defendre.
Maudite soit l’eure que je te fis !
Au mol pasteur va li loups brebis prendre.
25 Sanz coup ferir ne se doit prince rendre.
Euvre les yeux de ta pensee obscure,
Prens de tes genz la defense et la cure,
Esveille toy, trop me fais de douluer,
Et ne dy plus, car c’est trop grant laidure :
30 J’ay terre et corps, mais je n’ay point de cuer.
Tu es de gens et de terre garnis,
Tu ne dois riens fors a victoire tendre.
Ceulz t’ayderont contre tes ennemis.
Mais tout premier dois les grans fais emprendre,
35 Aler par tout, comme fist Alixandre,
Donner du tien, sanz compte et sanz mesure,
Les bons tenir et amer sanz droiture,
Faire du bien, non pas tolir le luer.
S’autrement fais, dire pués comme ordure :
40 ― J’ay terre et corps, mais je n’ay point de cuer,
Lors me sembla que cilz fu esbahis
Que Nature savoit ainsi reprendre
Et maudisoit ceulz dont il fu nourris,
Qui ont son cuer plus amoli que cendre.
45 Nature dit : ― Chace hors sur le prendre
Les cuers faintis qui t’ont fait tel morsure.
Je te fis cuer, or le remet desseure.
Use souvent de vaillance la fleur.
Vaillans seras sanz dire a desmesure :
50 J’ay terre et corps, mais je n’ay point de cuer.
L’envoy
Prince, a ce mot fu du tout desdormis, 132b
Et ce debat en mon memoire mis,
Si ne savoye que penser a nul fuer.
Mais pensant m’estoit asséz advis
55 Que dire puet maint hault homs qui est vis :
J’ay terre et corps, mais je n’ay point de cuer.