Chançon royal 72 : Je voy la fin de ce monde aprouchier (CCCLXXXVI)
Autre Balade
Je voy la fin de ce monde aprouchier,
Selon le dit de la sainte Escripture,
Et l’un peuple contre l’autre drecier, 131a
Rebellion faire contre droiture.
5 Pestilence regner[1] contre nature,
En terre, en air, en lune et en souleil,
Pour les pechiéz de mainte creature,
Et ne voit nul ce qui lui pent a l’ueil.
L’une cité fait l’autre trebuschier,
10 Le pere au fils combat et desnature,
Raison deffault, nul n’a justice chier,
Amour n’a lieu, chascun ment et parjure.
A son seigneur fait le subget injure.
Dieux n’est doubtéz. Avarice et orgueil
15 Regnent si fort que c’est male avanture,
Et ne voit nulz ce qui lui pent a l’ueil.
Nulz ne veult [or] verité atouchier
Ne charité, fors pechié et ordure.
Clerc se deffont, laboureur, chevalier,
20 Ces trois estas excedent leur mesure.
Nulz n’est améz, fors tant comme l’or dure.
Povres loyaulx n’a riens, dont je me dueil.
Pour ce s’en va tout a desconfiture,
Et ne voit nulz ce qui lui pent a l’ueil.
25 Je voy maison sur maison tresbuschier,
Terre mouvoir et de gent grant pressure,
Guerre partout, royaumes essillier,
Monde faillir par feu et par arsure,
Sanz nulle paix, ne quant mais quant murmure.
30 De voulenté dit chascun : ― Ainsi vueil,
Sanz Dieu amer, sanz veoir la fin dure,
Et ne voit nulz ce qui lui pent a l’ueil.
Dont je puis bien conclurre sanz pechier
Par ces signes que l’Euvangile[2] escure,
35 Que le monde veult sa fin adrescier
Pour no vie qui est male et obscure.
Crions mercy tant que Dieu de nous cure 131b
Ait et pitié, car trop fort me merveil
Qu’il sueffre tant de noz maulx la porture,
40 Et[3] ne voit nulz ce qui lui pent a l’ueil.
L’envoy
Prince, je tien, a proprement jugier,
Que ce monde veult sa fin abregier,
Selon les diz des sains que veoir sueil,
Car la terre fait ses fruis a dangier,
45 L’aage est petis, l’un veult l’autre mengier,
Et ne voit nulz ce qui lui pent a l’ueil.
[1] Ms. signer
[2] Ms. Euvangeliste
[3] Ms. Et si