Chançon royal 70 : Se li mauvais feussent a droit pugny (CCCLXXXIV)
Autre Balade
Se li mauvais feussent a droit pugny,
Et li bon feussent amé et soustenu,
Et li seigneur en leur vaillance uny,
Religieux en sainté[1] maintenu,
5 Ja ne nous fut tant de malx avenu.
Tout alast bien, or voy tout bestourner
Par le deffault de justice et vertu : 130b
Male chose est que de peuple regner.
Les mauvais sont honnoréz et chery,
10 Et li bon sont pour maleureux tenu,
Et li seigneur par menteurs sont honny,
Religieux seculiers devenu,
Et gouverner veult le peuple menu,
Du quel l’orgueil Dieu ne puet endurer.
15 Prince en tel cas souffrant est malostru :
Male chose est que de peuple regner.
Roy voult avoir, et Dieu l’a consenty.
Le droit du roy a Samuel rendu
De mot a mot : serf sera envers ly,
20 Et le peuple l’a d’un accort voulu.
Le leur prendra de son droit absolu
Et leurs enfans pour leur[2] charroy mener,
Toudis les ait subgis soubz son escu :
Male chose est que de peuple regner.
25 Et quant d’eulz est leur seigneur obey,
Et humblement en tous cas secouru,
Amer les doit, ne soient envahy,
Riens d’eulz ne soit adonc pris ne tolu
Mais, en tous cas, gardé et deffendu.
30 Lors fait le bien commun a preferer,
Autrement non. J’ay pieça entendu :
Male chose est que de peuple regner.
Peuple sanz chief n’a raison ne mercy,
Fors voulenté, si sont tost confondu.
35 En un moment est leur propos feny,
En un moment ont levé un grant hu.
Si fault avoir seigneur vif et agu
Qui leur folour puist tantost rebouter
Et corrigier leur vouloir dissolu :
40 Male chose est que de peuple regner.
L’envoy
Prince, qui veult estre bien seigneurry 130c
Ait verité et prouesce autressy,
Justice avec, sanz l’autrui convoiter,
Et soit crueux contre son ennemy.
45 Ayme les bons et soit des siens servy :
Male chose est que de peuple regner.
[1] Ms. en sainte eglise
[2] Saint Hilaire corrige en son
