Chançon royal 69 : Noyron, Cresus ne Julius Cesar (CCCLXXXIII)
Autre Balade
Noyron, Cresus ne Julius Cesar,
Alixandre[s] et Hector et Pompee,
Daires li grans, Tarquinus, Baltazar,
Dont li plusieurs orent grant renommee,
5 Ne sceu[r]ent pas de puissance ordenee
[Bien] resister a leur fin merveilleuse.
De leur fin est la vie tresmuee :
Deffault d’avis est chose perilleuse.
Noyron crueulx sa mere ouvrir en char
10 Fist. Par lui fu sa suer deshonnoree.
Les feux bouter a Romme fist lors, car
Plus desloyaux ne ceingny onc[1] espee.
Mais en la fin de mort desesperee
Son corps occist, crueux, de mort crueuse.
15 Au gibet fu la char Cresus levee :
Deffault d’avis est chose perilleuse.
Et Julius ou Capitale par
Les senateurs fu sa vie finee.
Alixandre[s] empoisonné fu, mar
20 Ala. Hector, la teste desarmee,
D’Achilles fu occis. Et Tholomee
La teste prist par maniere doubteuse
De Pompee, Cesar fut presentee :
Deffault d’avis est chose perilleuse.
25 Mestier eust eu du senz Eleazar
Daires, de qui fu la terre gastee 130a
D’Alixandre qui conquist jusqu’a Far,
Tant que vie n’est Daire demouree.
Tarquinus, roy de Romme renommee,
30 Fu exilliéz par sa vie orguilleuse.
A Baltazar fu Babiloyne ostee :
Deffault d’avis est chose perilleuse.
Cyrus le prist. Or, dist Albumasar,
Mainte chose est a homme destinee.
35 Mais d’accort suy avec Salmanasar
Que Franc Vouloir, arbitre de pensee,
Puet sur les cours par raison ascenee
Seigneuri[e]r par vertu vertueuse,
Car par non sens est mainte mort livree.
40 Deffault d’avis est chose perilleuse.
L’envoy
Princes, je tien que la mort recitee
De ces seigneurs fu vie mal usee,
Qui telle fin leur donna maleureuse,
Et que non sens, negligence causee,
45 En destruit moult et pour a concleuse
Deffault d’avis est chose perilleuse.
[1] Ms. oncques
