Chançon royal 68 : Roys Pharaon qui le peuple charga (CCCLXXXII)
Autre Balade
Roys Pharaon qui le peuple charga
En Egypte par ses subvencions,
Que Moyses a ce temps descharga,
D’Israel fu leurs generacions,
5 Envoia Dieux dix persecutions
A Pharaon et a toute sa gent,
Mais neantmoins fu dur come uns lyons :
On dit que fol ne doubte jusqu’il prent.
Ces plaies vit, et chascun les doubta,
10 A Moyse fist supplicacions 129c
De les oster, dit qu’il s’amendera
Et au peuple fera remissions.
Dieu lui osta, mais plus d’affliccions
Faisoit aprés au peuple et de tourment,
15 Dont, au derrain, fu sa destruccions :
On dit que fol ne doubte jusqu’il prent.
Car le peuple d’Israel s’en ala
Parmi la mer, et leurs congnacions,
Qu’a sa verge Moyses devisa.
20 Sanz eulz moullier fu leur transaccions,
Mais aprés eulz envoya Pharaons
Egipciens pour leur destruisement,
Qui se bouterent est inundacions :
On dit que fol ne doubte jusqu’il prent.
25 Lors furent ilz mors et noyéz ila.
La mer se clost, et pour ce l’appellons
La Rouge mer que leur sanc demoura.
La fu faicte tresgrant occisions,
La vit le roy ses miseracions
30 Et Ysrael passer a sauvement.
De ses meffais ot les pugnicions :
On dit que fol ne doubte jusqu’il prent.
A memoire cest histoire prendra
Cuers endurcis es maulx oppinions.
35 Se saiges est, il s’en corrigera.
Bon fait doubter males evencions,
Quant on a veu signes et mocions
Et c’om les voit naistre tresclerement
De jour en jour. Es maulx ne nous fions :
40 On dit que fol ne doubte jusqu’il prent.
L’envoy
Prince, male est perseveracions. 129d
Par autrui fait chastier nous devons,
Et qui le fait, il œuvre saigement.
Mais se de fait et voulenté ouvrons
45 Contre raison, en grant peril vivons :
On dit que fol ne doubte jusqu’il prent.
