Chançon royal 66 : Les trois maisons que firent li Rommain (CCCLXXX)
Autre Balade
Les trois maisons que firent li Rommain,
Au comencier de leur grant seigneurie,
Furent faictes de vray cuer et certain
Pour honnorer bonne chevalerie,
5 Armes suir et la bachelerie,
Afin que tous feussent preux en leurs fais
Et qu’ilz feussent mis ou livre de vie,
Ainsi fist on, mais on ne le fait mais.
L’ostel premier maison de vertu claim,
10 Ou li puissant avoient chiere lie,
Qui par vertus en maint pays lointain
Orent souffert travail, paine et hachie.
De cel hostel leur conquest assouvie,
Leur fu convis en l’ostel d’honneur fais,
15 Car sanz vertu n’y aprochassent mie.
Ainsi fist on, mais on ne le fait mais.
Le tiers hostel estoit de repos plain,
Quant la barbe leur devenoit florie.
En guerredon et comme souverain,
20 Leur estoit la leur paine remerie
De leurs travaulx, en tout ou en partie.
Et cilz lieux fu nomméz Temple de Paix, 128d
Ou l’en vivoit sanz mal et sanz envie.
Ainsi fist on, mais on ne le fait mais.
25 Es trois maisons n’entrast ja cuer villain,
Lasches, couars, ne homs plain de boidie,
Se des vertus n’eust des armes reclain,
Esté tiron, ou conquerre baillie.
De la faisoit en honneur sa saillie,
30 Et ne cessast de traveiller jamais,
Au temple aloit, sa vaillance acomplie.
Ainsi fist on, mais on ne le fait mais.
Dont il avient que telz a le cuer vain
Et qui ne vault une pomme pourrie,
35 Que l’en fait chief devant bon capitain,
S’en est souvent la contree perie.
Les bons s’en font lasches aucune fie
Quant ilz voient honnorer les mauvais.
Or y penséz, mes sires, je vous prie.
40 Ainsi fist on, mais on ne le fait mais.
L’envoy
Princes, seigneurs venus de grant lignie
Doivent des bons aimer la compaignie,
Les honnorer, remerir leurs biens fais,
Et des chetifs ne facent leur mesgnie.
45 Ces trois maisons un chascun d’eulz n’oublie.
Ainsi fist on, mais on ne le fait mais.
