Chançon royal 67 : J’ay cinquante ans esté sanz audience (CCCLXXXI)
Autre Balade
J’ay cinquante ans esté sanz audience, 129a
Que je n’ay eu espace de parler
A l’Eglise, dont je faiz conscience,
Car ilz ont fait mes disciples tuer,
5 […]
Pour dire voir, par l’orgueil d’un chascun,
Tant me heent avec le bien commun,
Qu’au monde n’a n’en ceste mortel vie
Qu’avarice, luxure et son ort flun,
10 Desloyauté, trahison et envie.
Symon Magus use de sa science,
Gezy lui fait l’Eglise gouverner.
Nul povre clerc, pour sa grant suffisance[1],
Ne pourroit pas benefice impetrer.
15 Aux cardinaulx fault promettre ou donner,
Qui veult avoir Reins, Soissons ou Verdun.
Pierres et Pols, qui bien furent tout un,
N’avoient pas telle loy establie.
Au jour d’uy font le siege en Esrum
20 Desloyaulté, trahison et envie.
Les grans princes n’ont en eulz attrempance,
Mais par orgueil veulent tout surmonter,
Ravir le bien du peuple et la substance
Sanz le commun ne l’Eglise garder
25 Leurs grans estas font leurs terres gaster
Par les consaulx de l’autre, et puis de l’un.
Charles le grant conquist a l’acier brun
Ce que pluseurs perdent par couardise :
Petit en sçay qui n’aient, fors aucun,
30 Desloyauté, trahison et envie.
Tout le peuple vit[2] en desordenance
Sanz craindre Dieu, ne sanz prince doubter.
Hautains de cuer, oultrageux en puissance,
Faulx en ses fais, et ne veult labourer.
35 En son orgueil veult trop perseverer,
Ce que Dieu het a saoul et a jeun.
Romme en pery, aussi fist Meleun.
Par orgueil est mainte terre perie. 129b
Or laissons donc ce perilleux leun,
40 Desloyaulté, trahison et envie.
Avise toy, car preste est la sentence,
Que Dieu les doit pour leurs maulx condempner.
Verité suy : or aient repentence
Et ne laissent leurs esperiz dampner.
45 Aux premiers droiz veulent tuit retourner,
Facent le bien, pechié est mal egrun.
Dieu feroit bien a la priere d’un
Juste loyal grace, n’en doubtéz mie.
Reboutent donc l’ort buvrage de prun,
50 Desloyauté, trahison et envie.
L’envoy
Prince, long temps ay esté sanz loquence
Par tout le mond, sanz nulle difference,
Ou les mauvais m’ont sanz raison haye,
En Arragon, en Espaigne et en France,
55 Ou regner voy, defaillant ma presence,
Desloyaulté, trahison et envie.
[1] Ms. pour sa science
[2] Ms. est