Chançon royal 65 : L’an mil .ccc. ung avec quatre vins (CCCLXXIX)
Autre Balade
L’an mil .ccc. ung avec quatre vins,
Le premier jour du doubteux mois de mars,
Leva grant vent de paillars et coquins,
Qui a Paris couru de toutes pars.
5 Es halles fu leur douloureux essars.
Le[1] Chastellet despoullerent adonc
Des prisonniers. Lors me dist uns coquars :
Fuiéz, fuiéz pour les maillés de plonc. 128b
Esbahy fu : de la au Boy m’en vins.
10 Ne demourasse a Paris pour cent mars.
Mais, Dieu mercy, chevaulx et harnoiz prins,
Et m’en fouy comme lievre couars.
La veissiéz les genz du roy espars,
Qui fuioient au travers et au lonc,
15 Pour yssir hors. Lors crioient les gars :
Fuiéz, fuiéz pour les maillés de plonc.
Prelas, noble[s], conseil par les mastins
Laissent Paris, fuient comme renars,
L’un par Saine, l’autre a autres chemins.
20 Telz fu gouteux qui sault comme lipars :
Chaude yaue craint cilz qui a esté ars.
Il fault ploier contre force le jonc,
Et quant temps yert, c’om die a telz paillars :
Fuiéz, fuiéz pour les mailles de plonc.
25 Au derrenier sera male leurs fins.
Sur ces poins ait le prince ses regars,
Et que faveur ne amitié, n’or fins,
Contre s’onneur ne soit escus ne dars
Aux maleureux. Fors atnt qu’a male[s] hars
30 Soient pendus ou tailléz sur le tronc,
Pour l’exemple monstrer a telz musars :
Fuiéz, fuiéz pour les maillés de plonc.
Car pis ont fait que ne font Sarrazins :
Saint Germain ont assailli les sotars,
40 Destruis les biens et fourmendéz les vins,
Maisons fraictes, mortes ygnoscens chars,
Cloz leurs[2] portaulx, et retenus les chars
L’oncle du roi de Bourgongne. Et selon
Ce que je voy, a dire me depars :
45 Fuiéz, fuiéz pour les maillés de plonc.
L’envoy
Prince, je suis a vous descripre enclins 128c
Que long temps fu Justice sanz affins,
Que tout ala de travers et belonc
En la cité ou vostre nom fu prins.
50 Pugnissiéz ceulz disans, qui ont mesprins :
Fuiéz, fuiéz pour les maillés de plonc.
[1] Ms. Les
[2] Saint Hilaire corrige en les