Chançon royal 64 : Troye la grant, Babiloine, Ylion (CCCLXXVIII)
Autre Balade
Troye la grant, Babiloine, Ylion,
Et Nynive la grant, Romme gastee,
Furent jadis en grant dominion,
Qui au jour d’uy n’ont pays ne contree,
5 Fors trop petit, avec la renommee
De leur pouoir qui, par deffault d’avis,
Fut tout destruit par mauvaise pensee,
Par le regne des maleureux chetis.
Orgueil les mist a grief perdicion,
10 Convoitise a leur fin determinee,
Pechié de char, dissimulacion,
Hayne entr eulz, envie la dervee,
Le bien commun que chascun d’eulz devee,
Tant qu’ilz furent de tous lieux envais,
15 Mors, subjuguéz, et leur gloire finee
Par le regne des maleureux chetis.
Mais par deffault d’amour et d’union,
De pou pugnir, de mal paier souldee,
Est conceue mainte rebellion,
20 Par justice qui en rien n’est gardee, 128a
Par genz tenir plus qu’a raison n’agree,
Et de despendre folement, ce m’est vis,
Les bos n’ont riens. Mauvais ont la donnee
Par le regne des maleureux chetis.
25 Car le commun est en elacion,
Qui sanz raison se mue[1] a la volee,
Et ainsi vient la grant destruccion,
Quant terre s’est au seigneur revelee.
Adonc entre eulz convient fere mellee,
30 Entretuer ceulx qui sont d’un pays.
Mal est adonc la chose a fin menee
Par le regne des maleureux chetis.
L’envoy
Princes, je tien, et pour conclusion,
Que les citéz qui font commocion
35 Au souverain meuvent trop grans perils.
Pour ce leur lo qu’en grant devocion
Crient mercy, ou trestuit periron
Par le regne des maleureux chetis.
[1] Ms. muce
