Chançon royal 63 : Jamais sire ne se face subget (CCCLXXVII)
Autre Balade
Jamais sire ne se face subget,
Mais ses sybgez tiengne en subgeccion,
Car il ne puet avoir si dur object
Com de ses serfs mettre en elacion,
5 Car los ont ilz queue d’escorpion,
Mors[1] de serpent a langue venimeuse,
Voix de torel, courage de lyon.
Serf[2] esleve[r] est chose perilleuse.
Sage n’est pas qui de serf seigneur fait. 127c
10 Car serf seigneur n’a pas discrecion,
Mais en orgueil considere son fait,
Ingrat devient. Ne donnerent poison
Li serf franchy par mortel trahison
A Alixandre ? Chose fu merveilleuse.
15 N’ont fait les serfs mainte rebellion ?
Serf esleve[r] est chose perilleuse.
Estre trop doulx son serf eslieve et met
Sires souvent en sa destruccion.
Pour ce est trop fols sire qui s’entremet
20 Fors que d’avoir la dominacion
[…]
Moiennement, par voie riguereuse
Se mestier est, selon m’opinion :
Serf eslever est chose perilleuse.
25 L’Escripture trois ordres nous retret
Necessaires en toute region.
Chevalier, prestre et laboureur qui fuet.
L’un nous deffent, l’autre fait oroison,
Laboureur ait les biens dont nous vivon
30 Croistre et venir. Deffense creureuse
Aux chevaliers est. Pour ce vous dison :
Serf[3] eslever est chose perilleuse.
Roys chevaliers, peuple a seigneurs attret,
Et Dieux en fist la confirmacion
35 A leur clameur : pour ce peuple mefet,
Qui vers son roy fait murmuration,
Et li prince a petit de raison
Qui se sousmet a tel gent maleureuse.
Garde son droit, c’est ma conclusion :
40 Serf eslever est chose perilleuse.
L’envoy
Princes, ces trois dont je fais mencion : 127d
Chevalier, clerc et laboracion,
Deussent estre un en œuvre vertueuse.
Mais les menus font la commocion
45 Par eulx monstrer trop grant affeccion :
Serf[4] eslever est chose perilleuse.
[1] Ms. Mort
[2] Ms. Cerf
[3] Ms. Cerf
[4] Ms. Cerf
