Chançon royal 62 : Quant nobles cuers a afere a pareil (CCCLXXVI)
Autre Balade
Quant nobles cuers a afere a pareil[1]
Et a puissant de sa condicion,
Contre lui doit monstrer son appareil 127a
Et du mal fait prendre pugnicion.
5 Car lors garde il son honneur
Et lors monstre sa force et sa valeur,
Quant il assault en sa prosperité
Son ennemi et l’espargne en douleur,
Car vaincus est homs en adversité.
10 Moult d’ennemis sont venus par orgueil,
Dont je ne vueil cy faire mencion,
Qui de bas lieu venoient en escueil,
Oultrecuidéz et plus fier que lyon,
Tant que c’estoit grant erreur.
15 Et encor est de veoir leur orreur,
Dont ilz cheent en grant chetiveté.
Desconfit sont quant ilz perdent le leur,
Car vaincus est homs en adversité.
Le cuer noble croit toudiz bon conseil,
20 Car il n’a pas queue d’escorpion.
Il ne point pas ceulx qui sont en sommeil,
Ne pas ne veult ferir en trahison,
Ne demonstrer sa fureur
Au douloureux qui n’a nulle vigueur,
25 Qui de richesce est cheu en povreté.
Laissier le doit sanz toucher a nul fuer,
Car vaincus est homs en adversité.
Mais des povres au jour d’uy me merveil
Qui se mettent en telle elacion,
30 Que d’orgueil sont sur tous[2] li non pareil,
Dont de pluseurs ont l’indignacion.
Ainsi monstrent leur foleur
Et descendent en tristesce et en pleur,
Qui les remet en leur chetiveté.
35 A telléz genz ne se prengnet seigneur,
Car vaincus est homs en adversité.
Et pour ce a tous, grans et petis, conseil 127b
Qu’umbles soient en dominacion
Et de faire bien soient en esveil,[3]
40 Car par orgueil vient tribulacion.
Fortune a tost getté feur[4],
De l’arbre hault les fueilles et la fleur.
Mais pou grieve l’arbre d’umilité.
Ne vous vengéz ja de l’homme en tristeur,
45 Car vaincus est homme en adversité.
L’envoy
Prince du puy, a tous maintenir vueil
Que cilz mondes fu perdus par orgueil,
Et recouvréz par humble humilité.
Soions humbles donques, je le conseil,
50 Et au chetif ne faisons appareil,
Car vaincus est homs en adversité.
[1] Ms. appareil
[2] Ms. tuit
[3] Ms. bien si soient en esveil
[4] Ms. fureur