Chançon royal 61 : Aage de pleur, d’angoisse et de tourment (CCCLXXV)
Autre Balade
Aage de pleur, d’angoisse et de tourment,
Tristes sur tous, plains de douleur amere,
En vie brief, fondé sur fondement
D’avarice qui est de tous maulx mere,
5 Est cet aage douloureux,
Pres de sa fin en guerre convoiteux,
Sanz joye, plain des sept vices mortelz,
Vuis des vertus, hautains des orguilleux,
Ou un chascun languist desconfortéz.
10 Malice y est des le commencement,
Enfance n’a ne jeunesce matiere,
Car l’un deçoit l’autre couvertement,
Pere le fils et le germain son frere.
Huy est le temps perilleux,
15 D’envie plain, d’acquerir angoisseux
Les furtis biens qui tost sont avortéz
Et trespassent soubdainement entre eulx,
Ou un chascun languit desconfortéz.
L’aage doré estoit bien autrement
20 Ou l’en vivoit longuement sans misere,
En vraye amour et trespacianment,
Des fruis des champs et de belle yaue clere.
L’un fu de l’autre amoureux,
Et nous sommes ingrat et hayneux,
25 Tant que l’un n’est de l’autre deportéz,
Mais nous tuons pour les biens temporeulx,
Ou un chascun languit desconfortéz. 126d
C’est ce qui fait de guerre mouvement,
C’est ce pour quoy chascun son fait compere.
30 Dieux n’est cremis ne doubtéz nullement.
Se l’un tont pres, l’autre veult le cuir rere.
Il n’est vray cuer ne piteux,
Pour un aignel regne soixante leux.
Nulz preudoms n’est en ce monde portéz,
35 Mais l’or y est fort, puissant, vertueux,
Ou un chascun languist desconfortéz.
J’eusse plus chier que anciennement
Nostre ancesseur eussent esté compere
De ces doulours qui sont presentement,
40 Ou que noz hoirs qui seront ça arriere
Eussent ces bien languereux
Dont nous sommes chetifs et souffreteux
Et en peril d’estre tous desertéz
D’ame et de corps pour ces biens douloureux,
45 Ou un chascun languit desconfortéz.
L’envoy
Prince, je tien que cest aage est doubteux
Et qu’en peril son tuit celles et ceulx
Que Fortune au jour d’uy apportéz
En telz perilz, en telz pechéz mortieux,
50 Et en telz biens faulx, vains et merveilleux,
Ou un chascun languit desconfortéz.