Chançon royal 60 : Par trois choses se fait mutacion (CCCLXXIV)
Autre Balade
Par trois choses se fait mutacion[1]
Des royaumes et de la seigneurie,[2]
De gent en gent, en[3] autre nacion.
L’une si est quant Justice est perie.[4]
5 La seconde quant chascun s’injurie[5],[6]
Et la tierce par convoiteux debas,[7]
Dissimuléz et fains en tricherie.[8]
Par ces trois poins vient tout pays au bas.
Justice tient la dominacion[9],
10 Terre et subgéz[10], et de droit seigneurie
En joye, en paix, en quietacion,
Par[11] faire droit a chascune partie.
Mais quant elle est par faveur departie
Et voulenté injuste[12] en pluseurs cas,
15 Plaine de dol, d’injure[13] et de folie, 126b
Par ces trois poins vient tout pays au bas.
Injurier par fole entencion[14]
Vient par orgueil, et saige s’umilie.
Par tel foulour vient tribulacion
20 Et par barat qui l’un l’autre conchie.
Par ces points[15] est mainte terre envaye
Et[16] lors la font[17] cheoir en autrui las
De gent en gent pour ce qu’elle est haye.
Par ces troiz poins vient tout pays au bas.
25 Et de ses trois[18] fait declaracion
Li saiges roys que l’escripture escrie[19].
Grace en perdi sa consolacion,
Babiloine changa sa[20] monarchie,
Et Troye en fu de tous poins deperie[21],
30 Romme la grant et Nynive, helas !
Jherusalem, Tourtouse et Ermenie :[22]
Par ces trois poins vient tous pays au bas.
Cartage en fu mise a destruccion,
Acre perdu, grant part de la Surie,[23]
35 Depuis la mort Godeffroy de Buillon[24].
Mais pluseurs genz ne s’i regardent mie.
Congnoissance est rop fort ensevelie.
Espaigne en fu en petit d’eure cas.
Du temps present tout se pert, sur ma vie :
40 Par ces trois poins vient tout pays au bas.
L’envoy
Princes, qui veult avoir dominion[25]
Doit ses subgéz nourrir en union,
Pugnir les maulx, eschever les debas,
Estre courtois, fuir decepcion.[26] 126c
45 S’autrement fait, il pert sa region.
Par ces trois opins vient tout pays au bas.
[1] Ms. Ashburnham Troiz choses sont qui font mutacion
[2] Ms. Ashburnham Dissimuler, fuir en tricherie
[3] Ms. Ashburnham ou
[4] Ms. Ashburnham Des royaulmes et de la seignourie
[5] Ms. singneurie
[6] Ms. Ashburnham L’une sy est quant justice est perie
[7] Ms. Ashburnham La seconde quant chascun sy enivre
[8] Ms. Ashburnham Et la tierce par convoiteux baras
[9] Ms. Ashburnham duancion
[10] Ms. Ashburnham armes
[11] Ms. Ashburnham De
[12] Ms. Ashburnham enste
[13] Ms. Ashburnham dure
[14] Strophe qui suit la 5e dans le ms. Ashburnham
[15] Ms. Ashburnham .iii. points
[16] Ms. Ashburnham Qui
[17] Ms. Ashburnham fait
[18] Ms. Ashburnham De ces .iii. choses
[19] Ms. Ashburnham qui l’escripture estudie
[20] Ms. Ashburnham sa mq.
[21] Ms. Ashburnham perie
[22] Ms. Ashburnham Jherusalem, courteuse et hunonie
[23] Ms. Ashburnham Acre en perdi frant point de la surye
[24] Ms. Ashburnham Billon
[25] Ms. Ashburnham duancion
[26] Ms. Ashburnham : vers 43-44 intervertis