Chançon royal 57 : Or vient li temps, selon la prophecie (CCCLXXI)

Autre Balade

                        Or vient li temps, selon la prophecie,
                        Que les grans maulx se doivent apparoir,
                        Et que muer doit mainte seigneurie.
                        Du reciter ay bien fait mon devoir.
5                      Mais il n’est nul qui vueille oir le voir,
                        Ne[1] resister a sa male fortune.
                        Chascun s’endort, sans son fait pourveoir[2] :
                        Deffault d’avis est chose trop commune.

                        En plusieurs lieux doit plorer Germanie.
10                    Acquitaine doit discorde mouvoir.
                        L’ille aux geans doit passer la navie
                        Et monstrera son derrenier[3] pouoir.
                        Villes et genz se doivent esmouvoir
                        En pluseurs lieux, chascun contre chascune.
15                    Mais l’en met tout ce fait a[4] nonchaloir :
                        Deffault d’acis est chose trop commune.

                        O Sebille de parfont sens garnie,
                        Et Joachim homme[5] plain de savoir[6],
                        Metheode[7], Daniel, Ezechie,
20                    Bien nous faites no misere savoir.                                                     125a
                        Li saige sot cuident[8] tout decevoir,
                        Mais leurs consaulx a l’esclipce de lune,[9]
                        Quant ne scevent leur salut concevoir :
                        Deffault d’avis est chose trop commune.

25                    Esveille toy, tu es trop endormie.
                        Qui trop s’endort, bien en puet pis valoir[10].
                        Aiéz honneur et vaillance a amie[11],
                        Fay Hardement avec toy[12] remanoir[13],
                        Crainte de Dieu. Fay de Pité ton hoir,
30                    Et Verité soit de tes dames l’une,
                        Ou autrement trop te[14] pourras douloir :
                        Deffault d’avis est chose trop commune.

                        Pharaon ot trop la teste[15] endurcie,
                        Ceulz d’Israel tourmenta main et soir,
35                    Son corps en fu, terre et ame perie[16].
                        On ne doit pas trop convoiter l’avoir
                        Ne grant estat sanz faire son devoir.
                        Diligence est entre les vertus une
                        Qui trenche plus que ne fait le[17] rasoir :
40                    Deffaut d’avis est chose trop commune.

                        L’envoy

                        Princes, cellui qui sa cure entroublie,
                        Quant il se voit en sa grant maladie,
                        Meurt de legier, s’a couleur palle et brune.
                        Mais se briefment a son fait remedie,[18]
45                    Il fuit la mort. A ces poins estudie :[19]
                        Deffault d’avis est chose trop commune.

[1] Ms. Ashburnham De

[2] Ms. et sens fait percevoir corrigé d’après le ms. Ashburnham

[3] Ms. Ashburnham derrain

[4] Ms. Ashburnham en

[5] Ms. Ashburnham homs

[6] Ms. Ashburnham grant savoir

[7] Ms. Ashburnham Methode

[8] Ms. Ashburnham sont cuidans

[9] Ms. Ashburnham Maiz leur conseil a esclipse de lune

[10] Ms. Ashburnham en peut bien pis valoir

[11] Ms. Ashburnham en baillie

[12] Ms. cy

[13] Ms. Ashburnham demourer

[14] Ms. Ashburnham t’en

[15] Ms. Ashburnham ot la teste trop

[16] Ms. Ashburnham Son corps fut terre et s’ame fut perie

[17] Ms. Ashburnham un

[18] Ms. Ashburnham Or a son fait briefment ne remedie

[19] Ms. Ashburnham vers mq.