Chançon royal 55 : Jehans, Pierres, Pols, Phelippe et Thomas (CCCLXIX)
Autre Balade
Jehans, Pierres, Pols, Phelippe et Thomas,
Andrieu, Jaques, Barthelemieu[1], Symons,
Judes[2] et Luc avecques Mathias
Furent de Dieu les puissans champions
5 Qui coururent par toutes regions,
Sonnans leurs doulces[3] busines 124a
Es trois langues ebrieux, grecques, latines,
Qu’ilz[4] conquirent par paynes et travaulx[5]
A la loy Dieu par leurs exemples dignes.
10 Au jour d’uy font ainsi les cardinaulx ?
En Ephesum[6] ot Jehan de[7] grans debas
Ou pour Dieu but venimeuses poisons.
Ens ou tonnel fu ses vierges[8] corps las,
En l’uille[9] ardant, es perilleux boullons.
15 Ne copperent[10] a Romme les felons
Pierre le chief qui, benignes[11],
Reçupt la mort, et Pols, pour ses doctrines,
En reprenant les princes des dieux faulx
Et[12] de l’erreur des creances indignes ?
20 Au jour d’uy font ainsi les cardinaulx ?
Phelippes fu en Sithe[13] bon prelas,
En Inde[14] fu Thomas noble maçons,
Biau palais fist. Berthelemieu[15], helas !
Fu escorchiéz. De saint Andrieu[16] lisons
25 Qu’en croix mouru. decapitacions
Fu a Jaques es[17] marines
De Compostelle et des marches voisines.
Judes[18] et Luc souffrirent moult de maulx.
Mathieu, Symons eurent poignans espines.
30 Au jour d’uy font ainsi les cardinaux ?
De Jhesucrist furent les advocas
Et de la Foy[19] furent chasteaulx et pons[20],
Et prescherent verité en tous cas.
De l’Eglise furent les drois patrons.
35 Ilz en furent mors, occis et deromps
Par leurs bonnes[21] disciplines.
Mourans de fain, sanz tolte et sanz rapines,
Alerent nuz, dessiréz et deschaulx,
En guerissent[22] tous malades par signes.
40 Au jour d’uy font ainsi les cardinaulx ?
Gezy[23] n’aloit ne Magus[24] un seul pas,
Car en ce temps ne regnerent leurs noms.
Les apostres ne le souffrirent pas.
L’Eglise estoit alors[25] donnee aux bons
45 Sanz pris d’argent. Mais pour Dieu regardons[26]
Les estas[27], les grans cuisines,
Les grans destriers, robes, manteaulx, ermines[28],
Les escuiers, la tourbe des chevaulx
Qui sont a court et les divers couvines[29].
50 Au jour d’uy font ainsi les cardinaulx.
L’envoy
Princes, je tien que ces douze barons
Furent cause des biens que nous avons,
Et par pechié sommes cause[30] de maulx
Que chascun jour tuit et toutes souffrons.
55 Crions mercy, mauvaise œuvre laissons :[31]
Au jour d’uy font ainsi les cardinaulx ?
[1] Ms. Ashburnham Berthelemi
[2] Ms. Ashburnham Judas
[3] Ms. douze corrigé d’après le ms. Ashburnham
[4] Ms. Ashburnham Qui
[5] Ms. par travaux corrigé d’après le ms. Ashburnham
[6] Ms. Ashburnham Ephesin
[7] Ms. Ashburnham de mq.
[8] Saint Hilaire corrige en son vierge d’après le ms. Ashburnham
[9] Ms. Ashburnham l’ mq.
[10] Ms. Ashburnham Et comparent
[11] Ms. Ashburnham qui tant estoit benignes
[12] Ms. Ashburnham Et mq.
[13] Ms. Ashburnham sithe
[14] Ms. Ashburnham indi
[15] Ms. Ashburnham Berthelemi
[16] Ms. Ashburnham Andry
[17] Ms. Ashburnham en ces
[18] Ms. Ashburnham Judas
[19] Ms. Ashburnham loy
[20] Ms. Ashburnham pas
[21] Ms. Ashburnham belles et bonnes
[22] Saint Hilaire corrige en guerissant d’après le ms. Ashburnham
[23] Ms. Ashburnham Jhesus
[24] Ms. Ashburnham marchoit
[25] Ms. Ashburnham lors
[26] Ms. Ashburnham regardans
[27] Ms. Ashburnham Les grans maisons
[28] Ms. Ashburnham Les grans estas, robes, vairs et hermines
[29] Ms. Ashburnham commis
[30] Ms. Ashburnham comme
[31] Ms. Ashburnham Haro crians mercy, malrage envie faison